تاۋەلسىزدىكتىڭ 30 جىلدىعىنا وراي شىمكەنتتە جاپپاي جۇگىرۋ ءوتتى. اسانباي اسقاروۆ اتىنداعى دەندرولوگيالىق ساياباقتا سپورتشىلار، سپورت مەكتەپتەرىنىڭ قىزمەتكەرلەرى مەن جاتتىقتىرۋشىلار قاتىستى. سالاۋاتتى ءومىر سالتىن ناسيحاتتايتىن ءىس-شارا ەل تاۋەلسىزدىگىنىڭ مەرەيتويى جانە مەملەكەت باسشىسىنىڭ حالىق اراسىندا بۇقارالىق سپورتتى دامىتۋ تاپسىرماسىن ورىنداۋ اياسىندا جۇزەگە اسىرىلىپ وتىر، دەيدى جاۋاپتى ماماندار.
– بۇگىنگى بۇقارالىق جۇگىرۋدى دە ەل تاۋەلسىزدىگىنىڭ 30 جىلدىعىنا ارناپ وتىرمىز. بۇگىنگى – ءۇشىنشى جۇگىرۋگە قالالىق دەنە شىنىقتىرۋ جانە سپورت باسقارماسىنا قاراستى 29 مەكەمەنىڭ قىزمەتكەرلەرى جۇمىلدىرىلعان. قاتىسۋشىلار 1,7 جانە 7 شاقىرىمعا جۇگىرەدى. جالپى، پرەزيدەنتتىڭ بۇقارالىق سپورتتى دامىتۋ تاپسىرماسى شىمكەنت قالاسىنىڭ اكىمى مۇرات دۇيسەنبەكۇلىنىڭ تىكەلەي باقىلاۋىمەن اتقارىلۋدا. بۇگىنگى تاڭدا شىمكەنت تۇرعىندارىنىڭ 31 پايىزدان استامى بۇقارالىق سپورتپەن شۇعىلدانادى. الدا وسى مەجەنى 34 پايىزعا جەتكىزۋ جوسپارى بار. وسى ماقساتتا ۇيلەردىڭ اۋلالارىنا جالپى سانى 115 سپورت الاڭشاسىن سالۋ تۋرالى كەشەندى جوسپار جۇزەگە اسىرىلۋدا. ونىڭ ىشىندە 14 الاڭشانى كاسىپكەرلەر ءوز تاراپىنان سالىپ، قالا تۇرعىندارىنا سىيعا تارتادى، – دەدى باسقارما باسشىسىنىڭ ورىنباسارى ەرمەك دارمەنوۆ.
بۇقارالىق جۇگىرۋگە ۇزىن-سانى 300-گە جۋىق ادام قاتىستى. قاتىسۋشىلار الدىمەن دەنە قىزدىرۋ جاتتىعۋلارىن جاساپ الىپ، سودان كەيىن ەكى قاشىقتىقتا جۇگىرىپ كەتتى. جەڭىمپازدار مەرەكەگە قاراي وتەتىن سالتاناتتى ءىس-شارادا ماراپاتتالماق.
