قر پارلامەنت سەناتىنىڭ دەپۋتاتى باقىتجان جۇماعۇلوۆ ەلباسى نۇرسۇلتان نازارباەۆتىڭ «تاۋەلسىزدىك تاعىلىمى» اتتى ماقالاسىنا قاتىستى پىكىر ءبىلدىردى، دەپ حابارلايدى قازاقپارات.
«تاۋەلسىزدىگىمىزدىڭ 30 جىلدىعىنىڭ قارساڭىندا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىشۇلى نازارباەۆتىڭ «تاۋەلسىزدىك تاعىلىمى» اتتى ماقالاسى جاريالاندى. بابالارىمىز ارمانداعان ەلدىك پەن ەركىندىكتىڭ سيمۆولى بولىپ جالعاسقان ۇلى ارمانى – تاۋەلسىزدىك ەدى. ۇلان قايىر زامانداردىڭ تاريحي كارتيناسىن ەلباسى ماقالاسىنان كورەسىڭ. ساقتار مەن عۇندار، ودان سوڭ تۇركى حالقى ۇلى دالادا ءوز مەملەكەتىن قۇردى. ەلباسى داۋىلدار مەن دابىلدار، «جان الىسىپ، جان بەرىسكەن»، «ەگەۋلى نايزا» ۇستاعان ىقىلىم زامانداردان بەرى ۇلتىمىزدىڭ باعا جەتپەس وزىندىك داستۇرلەرى مەن عۇرپىن، ەركىندىكتىڭ رۋحى مەن رۋحاني كەڭىستىگىن، عاجايىپ ءتىلى مەن سۇلۋ سازىن ساقتاپ قالعان قاسيەتتەرىن تەبىرەنە جازادى. عاسىرلار توعىسىندا ادامزات تاريحىندا، ونىڭ ىشىندە قازاقستان تاريحىندا ەرەكشە ورنى بار تاۋەلسىزدىك سالماعىن كوتەرۋ ءوز تاعدىرىنا تيەسىلى ەكەنىن جوعارى جاۋاپكەرشىلىكپەن جەتكىزەدى. ارينە، ەلباسى جۇرەگىندەگى ءسوز – تاريح ءسوزى، زامان ءسوزى، ۇرپاق ءسوزى»، - دەپ اتاپ ءوتتى ب. جۇماعۇلوۆ.
سەناتوردىڭ ايتۋىنشا، كەڭەستەر وداعىنىڭ تاريحي جولدارىنا شولۋدى دا وسى ماقالادان تابا الاسىڭ. وتكەن عاسىردىڭ 70-ءشى جىلدارىنداعى جاعداي، ودان كەيىن گورباچەۆتىك «قايتا قۇرۋ» ساياساتى دا قالاي كۇيرەگەنىن ەلباسى اشىق جازادى.
