قر پرەزيدەنتى قاسىم-جومارت توقاەۆ «التىن ساپا» سىيلىعى جەڭىمپازدارىن قۇتتىقتادى.
«ءبىز ساپالاى ءونىم ءوندىرىپ، تابىستى جۇمىس ىستەپ جاتقان بيزنەس وكىلدەرىن جىل سايىن ماراپاتتايمىز. سونداي-اق، الەۋمەتتىك باستامالاردى جۇزەگە اسىرۋعا بارىنشا اتسالىسىپ جۇرگەن ىسكەر ازاماتتارعا قۇرمەت كورسەتەمىز. سول ارقىلى جاسالعان ەڭبەك پەن شىنايى تابىستىلىقتى دارىپتەيمىز. «التىن ساپا» بايقاۋى 15 جىلدان بەرى تۇراقتى وتكىزىلىپ كەلەدى. بۇگىنگە دەيىن 150-دەن استام كومپانيا پرەزيدەنت سىيلىعىنىڭ يەگەرى اتاندى»، - دەگەن مەملەكەت باسشىسى بيىلعى سالتاناتتى جيىن تاۋەلسىزدىكتىڭ 30 جىلدىق مەرەيتويىمەن تۇسپا-تۇس كەلگەنىن ەسكە سالدى.
«مۇنىڭ زور سيمۆولدىق ءمانى بار. ەگەمەندىك كەزەڭىندە قازاقستاندا بيزنەستىڭ دامۋىنا جان-جاقتى جاعداي جاسالدى. سونىڭ ناتيجەسىندە جاڭا زامانعا ساي كاسىپكەرلەر شوعىرى قالىپتاستى. ولار ۇلتتىق ەكونوميكانىڭ باستى قوزعاۋشى كۇشىنە اينالدى. بۇگىندە وتاندىق بيزنەس ەلىمىزدەگى يندۋستريالاندىرۋ ۇدەرىسىنە زور ۇلەس قوسۋدا. سوڭعى 10 جىلدا وڭدەۋ ونەركاسىبىنىڭ ەكونوميكاداعى ۇلەسى تاۋ-كەن سالاسىنىڭ كورسەتكىشىنەن اسىپ، 33 پايىزعا جەتتى. بۇكىل ەلىمىز بويىنشا 1500 جاڭا ءوندىرىس ىسكە قوسىلدى. بۇل ماقساتقا 9 ترلن تەڭگەدەن استام ينۆەستيتسيا جۇمسالدى. 820 مىڭنان استام تۇراقتى جۇمىس ورنى اشىلدى. بىلتىر وڭدەۋ ونەركاسىبىنىڭ ەكسپورتى ءۇش ەسە ءوسىپ، 15,4 ملرد دوللارعا جەتتى. قازاقستاندا وڭدەلگەن ونىمدەر بۇگىندە 131 مەملەكەتكە ەكسپورتتالادى»، - دەدى پرەزيدەنت.
