تاۋەلسىزدىكتىڭ 30 جىلدىق مەرەيتويى قارساڭىندا قالامگەر قانداسىمىز، اقىن، جازۋشىلار وداعىنىڭ مۇشەسى، «تۇلعا-دوستىق» قوعامدىق قورىنىڭ ديرەكتورى مۇراتحان شوقاننىڭ «قانداستار ۇلەسى» اتتى جاڭا كىتابىنىڭ تۇساۋكەسەرى ءوتتى.
جاڭالىققا جانى قۇمار كوپشىلىككە ارنالعان يگى شارانى «وتانداستار قورى» كەاق مەن نۇر-سۇلتان قالالىق اكىمدىگى جانىنداعى «قوعامدىق كەلىسىم» كمم (دوستىق ءۇيى) ۇجىمى بىرلەسە ۇيىمداستىردى. قارىمدى قالامگەردىڭ «قانداستار ۇلەسى» اتتى جاڭا جيناعىندا تاۋەلسىزدىك العان العاشقى جىلدارى قر تۇڭعىش پرەزيدەنتى - ەلباسى نۇرسۇلتان نازارباەۆ سارا جول سالىپ، بۇگىندە مەملەكەت باسشىسى قاسىم-جومارت توقاەۆ ءجىتى نازاردا ۇستايتىن قانداستار تاقىرىبى قامتىلعان.
تىڭ اقپاراتتارعا باي تۋىندىدا تاريحي وتانىمەن تابىسقان باۋىرلارىمىزدىڭ ەگەمەندى ەلىمىزدىڭ ءوسىپ-وركەندەۋىنە قوسقان سۇبەلى ۇلەسى جايىندا جانە وزدەرى ەڭبەك ەتەتىن سالادا كوش باسىنان كورىنىپ جۇرگەن وزىق ويلى عالىمدار مەن كاسىبي ماماندار، تالانتتى ونەرپازدار مەن تانىمال سپورتشىلار جانە ىسكەر كاسىپكەرلەر تۋرالى جازىلعان. تۇساۋكەسەر ءراسىمى اياسىندا الەمنىڭ ءار شالعايىنان اتاجۇرتقا ورالعان قانداستاردىڭ جەمىستى ەڭبەگى مەن جەتىستىكتەرىنەن سىر شەرتەتىن كىتاپتار، سۋرەتتەر، قولونەر بۇيىمدارى مەن كاسىپكەرلەردىڭ كورمەسى دە كوپشىلىك نازارىنا ۇسىنىلدى.
اتالعان ءىس-شاراعا «وتانداستار قورى» كەاق ۆيتسە-پرەزيدەنتى ماعاۋيا سارباسوۆ، قر ءسىم كونسۋلدىق قىزمەت دەپارتامەنتى قازاق دياسپوراسىمەن جۇمىس ءجۇرىزۋ باسقارماسىنىڭ باسشىسى نىسان داۋلەتالى، قر مسم مادەنيەت كوميتەتىنىڭ رەپەرتۋارلىق ساياسات جانە وڭىرلىك قىزمەتتى ۇيلەستىرۋ باسقارماسىنىڭ باسشىسى ريگا وناەۆا، قر اجقدم ەتنوسارالىق قاتىناستاردى دامىتۋ كوميتەتىنىڭ باس ساراپشىسى دانيار قويباعاروۆ، قر ەحاقم ەڭبەك الەۋمەتتىك قورعاۋ جانە كوشى-قون كوميتەتىنىڭ باس ساراپشىسى باقىت ارىستانوۆ، نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساكەن ەسىركەپ جانە زيالى قاۋىم، اقىن-جازۋشىلار، بەلگىلى عالىمدار، قولونەرشىلەر، سۋرەتشىلەر، الىس-جاقىن شەتەلدەردەن كەلگەن قانداستارىمىز بەن سان الۋان سالادا تابىسقا جەتكەن تانىمال تۇلعالار قاتىستى.
