قر تاۋەلسىزدىگىنىڭ 30 جىلدىعىنا ارنالعان سالتاناتتى جيىندا پرەزيدەنت قاسىم-جومارت توقاەۆ ازاتتىق جىلدارىنىڭ باستى بەلەستەرىن اتادى، دەپ حابارلايدى قازاقپارات.
«تاۋەلسىزدىكتىڭ 30 جىلى – ءبىز ءۇشىن تۇتاس داۋىرگە بەرگىسىز مەرزىم. ونى ءۇش بەلەسكە ءبولىپ قاراستىرۋعا بولادى. ءار ونجىلدىق عاسىردىڭ جۇگىن ارقالاپ تۇر. العاشقى ونجىلدىق – جاڭا قازاقستاننىڭ نەگىزىن قالاۋ كەزەڭى. وسى جىلداردا مەملەكەتتىك نىشاندارىمىز بەلگىلەنىپ، بيلىك جۇيەسى قالىپتاستى. ءتول تەڭگەمىز اينالىمعا قوسىلدى. ايبىندى ارميامىز قۇرىلدى. اتا زاڭىمىز قابىلداندى. انا تىلىمىزگە مەملەكەتتىك ءتىل مارتەبەسى بەرىلدى. اتا ءدىنىمىز ورالىپ، سالت-ءداستۇرىمىز جاڭعىرتىلدى. بىرلىگىمىزدىڭ باستاۋى بولعان قازاقستان حالقى اسسامبلەياسى قۇرىلدى»، - دەگەن قاسىم-جومارت توقاەۆ ەلىمىزدىڭ حالىقارالىق ارەناداعى بەدەلى قالاي قالىپتاسقانىن ەسكە سالدى.
«قازاقستان بەدەلدى حالىقارالىق ۇيىمدارعا مۇشە بولىپ قابىلداندى. ستراتەگيالىق دامۋ باعدارىمىز ايقىندالدى. شەكارا ماسەلەسىن زاڭ تۇرعىسىنان شەگەندەۋ ءۇردىسى باستالدى. قاسيەتتى جەرىمىز اتوم قارۋىنان تازارتىلدى. ەلوردامىز ەسىلدىڭ بويىنا كوشىرىلدى»، - دەدى پرەزيدەنت.
ايتا كەتەيىك، بۇگىن مەملەكەت باسشىسى قاسىم-جومارت توقاەۆتىڭ قاتىسۋىمەن قر تاۋەلسىزدىگىنىڭ 30 جىلدىعىنا وراي سالتاناتتى جيىن ءوتىپ جاتىر. سالتاناتتى ءىس-شاراعا قر تۇڭعىش پرەزيدەنتى – ەلباسى نۇرسۇلتان نازارباەۆ، ۇكىمەت مۇشەلەرى، پارلامەنت دەپۋتاتتارى، مادەنيەت جانە قوعام، ونەر، سپورت قايراتكەرلەرى، زيالى قاۋىم وكىلدەرى قاتىسىپ وتىر.
