مەملەكەت باسشىسى قاسىم-جومارت توقاەۆ قر تاۋەلسىزدىگىنىڭ 30 جىلدىعىنا ارنالعان سالتاناتتى جيىندا وسكەلەڭ ۇرپاققا اعا بۋىننىڭ ءۇمىتىن اقتاۋى ءۇشىن نە ىستەۋى كەرەكتىگىن ايتتى، دەپ حابارلايدى قازاقپارات.
«وسكەلەڭ ۇرپاق اعا بۋىننىڭ تاجىريبەسىن پايدالانىپ، ءۇمىتىن اقتايدى دەپ سەنەمىن. جولدارىڭىز كەدىر-بۇدىرسىز بولمايدى. سوندىقتان، كوپ ءبىلىم الىپ، رۋحاني جاعىنان بايىپ، ناعىز ازامات رەتىندە قالىپتاسۋ كەرەك.
ۋاقىت تىنىسىن ءدوپ باسىپ، زامان تالابىنا بەيىمدەلە بىلگەن جۇرت ەشقاشان ۇتىلمايدى. كەز كەلگەن سىناققا دايىن تۇرادى. ءبىز كۇش-قۋاتى مەن قارىم-قابىلەتى ساي كەمەل حالىق بولۋىمىز كەرەك. كۇندە وزگەرىپ جاتقان قۇبىلمالى كەزەڭدە بۇل ماقساتقا جەتۋ كۇردەلى ەكەنى انىق»، - دەدى مەملەكەت باسشىسى.
پرەزيدەنتتىڭ پايىمىنشا، قازىر الەمگە تۇراقسىزدىق فاكتورلارى اسەر ەتىپ تۇر. «ونىڭ ۇستىنە پاندەمياعا بايلانىستى جاڭا سىن-قاتەرلەر پايدا بولۋدا. بىراق جۇرتىمىز قيىندىقتىڭ ءبارىن ەڭسەرە الاتىنىنا سەنىمىم زور. سەبەبى تۇعىرى مىزعىماس مىقتى مەملەكەتىمىز بار.
دامۋ جولىمىزدى ناقتى نۇسقاپ تۇرعان ستراتەگيالىق ماقساتتارىمىز بار. ەلىمىز ءوزىنىڭ سارا جولىنان اينىماي العا قادام باسا بەرەدى. ءبىز ءۇشىن تاۋەلسىزدىك بارىنەن قىمبات. باعا جەتپەس قۇندىلىعىمىزدى قاستەرلەپ، قۋاتتى قازاقستاندى دامىتۋ ءۇشىن ءبارىمىز جۇمىلىپ، ءبىر ەل بولىپ ايانباي ەڭبەك ەتەيىك.
جالپىۇلتتىق مەرەيتويىمىز قۇتتى بولسىن! ەلىمىزدىڭ ابىرويى اسقاقتاپ، بەدەلى بيىكتەي بەرسىن! ەلباسىمىز امان بولسىن! قازاقستانىمىز ماڭگى بولسىن»، - دەپ تۇيىندەدى قاسىم-جومارت توقاەۆ.
