تاۋەلسىزدىك جىلدارىندا ەلىمىزدە مۇناي ءوندىرۋ 3,5 ەسە، گاز ءوندىرۋ 7 ەسەگە ۇلعايدى، دەپ حابارلايدى قازاقپارات. ەنەرگەتيكا ءمينيسترى ماعزۇم مىرزاعاليەۆتىڭ مالىمەتىنشە، ەلىمىز تاۋەلسىزدىك العالى ءوندىرۋدىڭ ءوسۋ قارقىنىندا ايتارلىقتاي سەرپىلىس بايقالعان.
«تاۋەلسىزدىكتىڭ 30 جىلىندا مۇناي ءوندىرۋ 3,5 ەسەگە، گاز ءوندىرۋ 7 ەسەگە ۇلعايدى. وسى كەزەڭدە 1,7 ملرد توننا مۇناي، 790 ملرد تەكشە مەتر گاز ءوندىرىلدى. ال، 1,4 ملرد توننا مۇناي ەكسپورتتالدى. 2020 جىلدىڭ قورىتىندىسىمەن گاز ءوندىرۋ كولەمى 55,1 ملرد تەكشە مەتردى قۇرادى. ەلەكتر ەنەرگەتيكاسى سالاسىندا بىرقاتار ماڭىزدى جوبالار جۇزەگە اسىرىلدى. سونىڭ ناتيجەسىندە ەلەكتر ەنەرگياسىن ءوندىرۋ 83 ملرد-تان 108 ملرد كۆت/ساعاتقا دەيىن ارتتى. ياعني 30%-عا ۇلعايدى»، -دەيدى ماعزۇم مىرزاعاليەۆ.
ءمينيستردىڭ ايتۋىنا قاراعاندا، جاڭارتىلاتىن ەنەرگيا كوزدەرىن دامىتۋدا دا جوعارى قارقىن بار. قازىر ەلىمىزدە جاڭارتىلاتىن ەنەرگيا كوزدەرىنىڭ 126 وبەكتىسى جۇمىس ىستەپ تۇر.
ونىڭ جالپى قۋاتى 1975 مۆت-تى قۇرايدى. «ءبىز وسى جەتىستىكتەرمەن توقتاپ قالماۋىمىز قاجەت. الدىمىزدا مۇناي-گاز، ەنەرگەتيكا سالاسىن دامىتۋدىڭ جاڭا بەلەستەرى تۇر. وسى جولدا ايانباي ەڭبەك ەتىپ، تاۋەلسىزدىكتىڭ جاڭا ونجىلدىعىندا ەلىمىزدى اسقاقتاتا بەرەيىك»، -دەپ اتاپ ءوتتى ماعزۇم مىرزاعاليەۆ.
