بۇگىن ەلوردادا تاۋەلسىزدىك كۇنى مەرەكەسى قارساڭىندا قر پرەزيدەنتى قاسىم-جومارت توقاەۆتىڭ جارلىعىنا سايكەس ەلىمىزدىڭ ساياسي، الەۋمەتتىك-ەكونوميكالىق دامۋىنا قوسقان ۇلەسى جانە بەلسەندى قوعامدىق قىزمەتى ءۇشىن ۇلتتىق كەڭەستىڭ ءبىر توپ مۇشەسى مەملەكەتتىك ناگرادالارمەن ماراپاتتالدى، دەپ حابارلايدى قازاقپارات.
«الدىمەن بارشاڭىزدى كەلە جاتقان تاۋەلسىزدىك مەرەكەسىمەن قۇتتىقتايمىن. 30 جىلدا ەلىمىز بىرقاتار جەتىستىككە قول جەتكىزدى. ونىڭ ءبارى حالقىمىزدىڭ ىنتىماقتاستىعى مەن ەڭبەگىنىڭ ارقاسى. تاۋەلسىزدىك كۇنى مەرەكەسى قارساڭىندا ەل دامۋىنا ەڭبەگى سىڭگەن ءتۇرلى سالا ماماندارى مەن تۇلعالار ماراپاتقا يە بولىپ جاتىر. ولاردىڭ قاتارىندا ۇلتتىق كەڭەس مۇشەلەرى دە بار. ارينە، قۋانىشتىمىز. بۇگىنگى ماراپاتتى ۇلتتىق سەنىم كەڭەسىنىڭ جۇمىسىنا بەرىلگەن باعا دەپ ەسەپتەيمىن»، - دەدى قر پرەزيدەنتىنىڭ كومەكشىسى ەرلان قارين ماراپاتتاۋ راسىمىندە.
ونىڭ ايتۋىنشا، ۇلتتىق سەنىم كەڭەسى قۇرىلعالى 2,5 جىل ىشىندە ەلىمىزدە 90-عا جۋىق قۇقىقتىق-نورماتيۆتىك اكتى قابىلداندى. «ءار قۇجاتتىڭ ارتىندا، قازاقستاندىقتاردىڭ مۇددەسى قاراستىرىلعان. جانە اتالعان قۇجاتتار قوعامداعى ناقتى ءبىر ماسەلەنى شەشۋگە باعىتتالعان. مەملەكەت باسشىسى ۇلتتىق سەنىم كەڭەسىنىڭ 15-كە جۋىق بەلسەندى مۇشەسىن ءتۇرلى مەملەكەتتىك ناگرادالارمەن ماراپاتتاپ وتىر. بۇل كەڭەس مۇشەلەرىنە قوعامداعى ءتۇرلى ماسەلەلەردىڭ شەشىمىن تابۋىنا قوسقان ۇلەستەرى ءۇشىن بەرىلىپ وتىرعان ناگرادا. الداعى ۋاقىتتا دا بىرلەسە وتىرىپ جۇمىس ىستەيتىنىمىزگە سەنىمدىمىن»، - دەيدى ول.
سونىمەن مەملەكەت باسشىسىنىڭ جارلىعىمەن پارلامەنت ءماجىلىسىنىڭ دەپۋتاتى باقىتبەك سماعۇل «پاراسات» وردەنىمەن ناگرادتالدى. سونداي-اق، «قۇرمەت» وردەنىمەن ماراپاتتالعاندار قاتارىندا مۇرات ابەنوۆ، ساياسات نۇربەك، تاتتىگۇل تالاەۆا مەن قانات ساحاريانوۆ بولدى. ودان بولەك، اسحات سادىرباي مەن ۋايس ەرسايىنۇلىنا، ارمان قاشقىنبەكوۆ پەن وركەن كەنجەبەككە «ەرەن ەڭبەگى ءۇشىن» مەدالى، ال الەكساندر دانيلوۆ پەن قايسار تۇرسىنقوجاعا «شاپاعات» مەدالى تابىستالدى. ءبورىحان نۇرمۇحامەدوۆ جانە ماكسيم روجين قر پرەزيدەنتىنىڭ العىس حاتىمەن ماراپاتتالدى.
