قازاقستان رەسپۋبليكاسى تاۋەلسىزدىگىنىڭ 30 جىلدىعىنا جانە جىر الىبى – جامبىل جاباەۆتىڭ 175 جىلدىعىنا وراي رەسپۋبليكالىق وقۋشىلار ايتىسى ءوتتى، - دەپ حابارلايدى قازاقپارات.
تۇركىستان وبلىسىنىڭ ادامي الەۋەتتى دامىتۋ باسقارماسى، تۇركىستان قالاسىنىڭ ادامي الەۋەتتى دامىتۋ ءبولىمى، وقۋشىلار سارايى مەن «بالالار مەن جاسوسپىرىمدەر ورتالىعى» بىرلەسە ۇيىمداستىرعان دوداعا الماتى، قىزىلوردا، جامبىل جانە الىس-جاقىن اۋدان، قالالاردان 12 جاس ايتىسكەر قاتىستى. ساحناعا شىققان جاس ايتىسكەرلەردىڭ ءسوز ساپتاۋىن دوسالى ەسەت (جامبىل), بەكمۇرات انارباەۆ، بالالار جانە جاسوسپىرىمدەر ورتالىعىنىڭ بۇقارالىق ءبولىم مەڭگەرۋشىسى ەمەن سامەتوۆ باعالادى. ەكى ساعاتقا سوزىلعان ايتىستىڭ قورىتىندىسى بويىنشا رەسپۋبليكالىق وقۋشىلار ايتىسىنىڭ جۇلدەلى III ورىندارىن ەلسيار قۇلاحمەت (شىمكەنت), ساپارحان اللاجار (شىمكەنت), دانيال بولىسبەك (وتىرار اۋدانى) يەلەندى.
ال II ورىندى ەلدار ءامىرحان (قىزىلوردا) جانە تاڭىربەردى بولات (تۇركىستان) ءوزارا بولىسسە، I ورىندى ايسۇلۋ جۇنىسبەك (جامبىل) يەلەندى. ال باس جۇلدە الماتى وبلىسىنان كەلگەن اقنۇر زينۋللاعا بۇيىردى.
وزا شاپقان دۇلدۇلدەردى تۇركىستان وبلىسىنىڭ ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ ماراپاتتادى. ايتىسقا تۇركىستان وبلىستىق كاسىپوداق كوميتەتى دەمەۋشىلىك جاسادى.
بارلىق ايتىسكەر اقىندارعا ارنايى العىس حاتتار مەن باعالى سىيلىقتار تابىستالدى.
