2021 جىلعى 12 جەلتوقساندا تەگەراننىڭ «پارسيان ازادي» قوناقۇيىندە قازاقستاننىڭ يرانداعى ەلشىلىگىنىڭ ۇيىمداستىرۋىمەن قازاقستان تاۋەلسىزدىگىنىڭ 30 جىلدىق مەرەيتويىنا ارنالعان سالتاناتتى قابىلداۋ ءوتتى، دەپ حابارلايدى قازاقپارات يران يسلام رەسپۋبليكاسىنداعى قر ەلشىلىگىنىڭ ءباسپاسوز قىزمەتىنە سىلتەمە جاساپ.
ءىس-شارانىڭ جوعارى مارتەبەلى قوناقتارىنىڭ قاتارىندا ير اۋىل شارۋاشىلىعى دجيھادى ءمينيسترىنىڭ ورىنباسارى م.عورباني، ير ءماجىلىسىنىڭ دەپۋتاتى - سەرپىلىس جانە ءوندىرىستى وركەندەتۋ جونىندەگى ارنايى كوميتەتى توراعاسىنىڭ ورىنباسارى –ير-قر پارلامەنتتىك دوستىق توبىنىڭ باسشىسى ع.نۋري عەزەلدجە، ير ساۋدا، ونەركاسىپ، كەن جانە اۋىل شارۋاشىلىعى پلاتاسىنىڭ ورىنباسارى م.كارباسي، ير سىرتقى ىستەر مينيسترلىگى ەۋرازيا دەپارتامەنتىنىڭ باس ديرەكتورى ءا.حاعيعيان، ير ءسىم كوپجاقتى جانە حالىقارالىق ەكونوميكالىق ىنتىماقتاستىق دەپارتامەنتىنىڭ باس ديرەكتورى س.ءالاۆي، يراننىڭ وزگە دە مەملەكەتتىك ورگاندارىنىڭ، تەگەراندا تىركەلگەن شەتەلدىك ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى، يراندىق كورنەكتى قوعام قايراتكەرلەرى، عىلىمي، شىعارماشىلىق زيالى قاۋىم جانە قازاق دياسپوراسىنىڭ وكىلدەرى – جالپى، 150-دەن اسا ادام قاتىستى. سالتاناتتى قابىلداۋدا يرانداعى قر ەلشىسى ا.ورازباي ءسوز سويلەپ، قازاقستان ءوز تاۋەلسىزدىگىنىڭ 30 جىلى ىشىندە ەكونوميكالىق رەفورمالاردى ءساتتى جۇزەگە اسىردى، ناتيجەسىندە كەڭەستىك ۇلگىدەگى جوسپارلى ەكونوميكا الەمدىك ساۋدا-ەكونوميكالىق جۇيەگە تولىقتاي ينتەگراتسيالانعان ەركىن نارىقتىق ەكونوميكاعا كوشتى دەپ اتاپ ءوتتى.
سونىمەن قاتار، ەلشى تاۋەلسىزدىك جىلدارى قازاقستانعا كەلگەن تىكەلەي شەتەلدىك ينۆەستيتسيا 380 ملرد. دوللارعا جەتكەنىن، بۇل ورتالىق ازياعا تارتىلعان شەتەلدىك ينۆەستيتسيالاردىڭ جالپى كولەمىنىڭ 75%-ىنان استامىن قۇرايتىنىن مالىمدەدى. ەلشى ا.ورازباي ءسوزىنىڭ جالعاسىندا قازاقستاننىڭ ماڭىزدى جەتىستىكتەرىنىڭ قاتارىندا ۇلتارالىق جانە كونفەسسياارالىق كەلىسىمنىڭ بىرەگەي مودەلى قالىپتاسقانىن، كورشى مەملەكەتتەرمەن، سونىڭ ىشىندە رەسەيمەن جانە قىتايمەن شەكارا تولىقتاي دەليميتاتسيالانعانىن، سونداي-اق كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويۋ ناتيجەسىندە تەڭىز شەكارالارىنىڭ دەليميتاتسيالانعانىن اتادى.
ەلشى قازاقستاننىڭ تاۋەلسىزدىك العان تۇستا الەمدەگى ءتورتىنشى يادرولىق ارسەنالدان ءوز ەركىمەن باس تارتقانى جانە سەمەي يادرولىق سىناق پوليگونىن جاپقانى حالىقارالىق قوعامداستىق مويىنداعان حالىقارالىق قاۋىپسىزدىككە قوسقان زور ۇلەسى بولعانىن اتاپ كورسەتتى. ا.ورازباي قازاقستان-يران قارىم-قاتىناسىنىڭ دامۋى تۋرالى بولەك ايتا كەلە، قازاقستان تاۋەلسىزدىك العان كۇننەن باستاپ ەكىجاقتى قارىم-قاتىناستار ارقاشان ەكىجاقتى دەڭگەيدە دە، كوپجاقتى فورماتتا دا ءوزارا قولداۋعا نەگىزدەلگەن ساياسي ديالوگتىڭ جوعارى سەرپىنىمەن سيپاتتالىپ كەلە جاتقانىنا باسا توقتالدى.
