موڭعوليا پرەزيدەنتى اكىمشىلىگىنىڭ باستاماسىمەن قازاق حالقىنىڭ ءداستۇرلى ناۋرىز مەيرامىنا وراي ناۋرىز ايىنىڭ 20-22 كۇندەرى بايان-ولگەي ايماعىندا «التايدىڭ ءۇش بيىگى - اقىت، بااست، اقتان» اتتى ايتىس جانە جىر ءمۇشايراسى ۇيىمداستىرىلادى. التايدىڭ ءۇش بيىگى اتانعاندار: اقىت قاجى ءۇلىمجىۇلى - اتاقتى قازاق اقىنى، ءدىني قايراتكەرى، حالىق اعارتۋشىسى; ءبوحين بااست - موڭعولدىڭ حالىق جازۋشىسى، بايان-ولگەي ايماعىنىڭ تۋماسى; اقتان بابيۇلى - محر مادەنيەتى مەن ونەرىنە ەڭبەگى سىڭگەن قايراتكەر، اقىن ءارى دراماتۋرگ، دەپ حابارلايدى
ءمۇشايرا تالاپتارىنا سايكەس، قاتىسۋشىلار سايىسى ءۇش كەزەڭ بويىنشا وتكىزىلەدى. جازبا اقىنداردىڭ جاس شاماسى 18-65 ارالىعىنداعى بولۋى قاجەت. ءبىرىنشى كەزەڭدە «وتان» تاقىرىبىندا جازىلعان ءبىر ولەڭدى موڭعول، قازاق تىلىندە جازىپ الدىن الا ۇيىمداستىرۋشىلارعا تابىستايدى. تۋىندىلاردى تورەشىلەر باعالايدى. ودان، ەكىنشى كەزەڭگە وتكەن اقىندار ولەڭدەرىن وقيدى. ەڭ سوڭىندا، سوڭعى كەزەڭگە جولداما العان 15 اقىن ولەڭدەرىن وقىپ بەرەدى.
سونداي-اق قازاقستاننان، رەسەي فەدەراتسياسىنان جانە قىتاي حالىق رەسپۋبليكاسىنىڭ شىڭجاڭ ولكەسىنىڭ اقىندارى قاتىساتىن «ايتىس-شوۋ» وتەدى.
«التايدىڭ ءۇش بيىگى - اقىت، بااست، اقتان» - پوەزيالىق جارىسقا، موڭعول ەلىنىڭ مادەنيەتىنە ەڭبەك سىڭىرگەن قايراتكەرى، موڭعوليا جازۋشىلار وداعىنىڭ باسقارما مۇشەسى ارلاانى ەردەنە-وچير، موڭعول ەلىنە ەڭبەك سىڭىرگەن قايراتكەر، موڭعوليا جازۋشىلار وداعىنىڭ بايان-ولگەي ايماعىنداعى بولىمشەسىنىڭ توراعاسى، اقىن سۇراعان راحمەتۇلى، «شۇعىلا» جۋرنالىنىڭ جاۋاپتى حاتشىسى ەركىنبەك بودەنۇلى، اقتان بابيۇلى اتىنداعى بايان-ولگەي ايماقتىق بۇقارالىق كىتاپحاناسىنىڭ ديرەكتورى اسقار شايماردانۇلى جانە باسقالارى تورەلىك ەتەدى.
اقىندار سايىسىنىڭ ماقساتى، موڭعول حالقىنىڭ انا ءتىلىنىڭ تۇتاستىعىن قامتاماسىز ەتۋ، ەتنيكالىق توپتاردىڭ مادەنيەتىن دامىتۋ، انا ءتىلىن دامىتىپ جانە جازباشا مادەنيەتتى قالىپتاستىرۋشى تالانتتاردى انىقتاپ، ىنتالاندىرۋ بولىپ تابىلادى.
قۋات ۋاتحان،
