ءوز باسىم ساياساتكەر نەمەسە مەملەكەت قايراتكەرى ەمەسپىن. تەك قانا قازاق ونەرىنىڭ ساپىندا جۇرگەن-قاتارداعى جاۋىنگەرمىن.
ەڭ باستىسى - قازاقستان دەگەن ۇلى مەملەكەتتىڭ تولىق قاندى ازاماتىمىن! ەگەر مەن قر-نىڭ تولىق قاندى ازاماتى بولعانىم راس بولسا، ياعني مەن ءوز ەلىم مەن ءوز جەرىمدە كوكەيىمدە جۇرگەن ويىمدى ورتاعا سالۋعا تولىق قۇقىعىم بار دەپ ەسەپتەيمىن!
وسىنداي ماعان ەل مەن جەردى، مەملەكەتتى ءناسىپ ەتكەن جاراتۋشىعا سان مىڭ شۇكىرشىلىكتەر ايتامىن!
دەمەك، قازىرگى قاعاز بەتىنە ءتۇسىرىپ وتىرعان ويىم ءۇشىن مەنى ەشكىم سىناپ-مىنەي قويماس دەگەن ويدامىن…
قۇدايعا شۇكىر، ەگەمەن ەل بولىپ، قازاق ەلىنىڭ كوك بايراعىنىڭ كوكتە جەلبىرەگەنىنە دە 30 جىل بولىپ جاتىر. كەلىپ جەتكەن تاۋەلسىزدىكتىڭ ارقاسىندا قانداي تۇرعىدا بولماسىن كوزىمىزدىڭ اشىلعانى راس! كوپتەگەن دۇنيەگە دە قول جەتكەنى تاعى بار.
دەسەك تە… 30 جىلدا ەلىمىزدە ءالى دە بولسا ءوز شەشىمىن تاپپاعان كوپتەگەن ماسەلەلەردىڭ بارىن ەل-جۇرت جاقسى بىلەدى جانە سول ءۇشىن الاڭدايدى! ول - قازاق جەرىندەگى جەر-سۋ اتتارى. مەنىڭ ايتپاعىم، الىسقا بارماي-اق مەنىڭ تۋىپ وسكەن مەكەنىم - نارىنقول اۋدانىمەن قولتىقتاس جاتقان ۇيعىر اۋدانى!…
(P.S. ايتا بەرسەك كەلمەسكە كەتكەن كەڭەس وداعىنان قالعان كوپتەگەن اتاۋلار بار عوي…)
سونىمەن، نەگە ول - ۇيعىر اۋدانى؟…
بىلەم! ول جەردى مەكەندەيتىن ەلدىڭ ورتاسىندا ۇيعىر ۇلتىنىڭ بار ەكەنىن.
بىلەم! ۇيعىر اعايىننىڭ قازاق باۋىرلارعا ىقىلاسىنىڭ جوعارى ەكەنىن.
بىلەم! قر-نىڭ كوپ ۇلتتى، تۇتاس مەملەكەت ەكەنىن.
بىلەم! ءبارىمىزدىڭ ءيىسى ءبىر - مۇسىلمان ەكەنىمىزدى.
بىلمەيتىن جانە تۇسىنبەيتىن ءبىر نارسەم بار… نەگە ول - ۇيعىر اۋدانى؟…
مەن بۇل ويىممەن ۇلتارازدىق تۇسىنىسپەۋشىلىك تۋعىزايىن دەپ وتىرعان جوقپىن. نەمەسە، ۇيعىر اعايىنداردى شەتتەپ جاتقان جوقپىن. ءومىر ءسۇرسىن، وركەندەسىن. نيەتتەس باۋىرمىز عوي.
ايتپاعىم، وسى اۋداننىڭ اتاۋىن وزگەرتۋ جونىندە بۇرىننان بەرى اقىلى اسقان اعا-اپالارىمىز بەن ساياساتكەر، قوعام جانە مەملەكەت قايراتكەرلەرى دە كوپتەگەن ۇسىنىستار جاسادى. بىراق… ول مەملەكەت باسىندا وتىرعان ارقا سۇيەر اعا-اپالارىمنىڭ قۇلاعىنا جەتسە دە، وسىعان نازار اۋدارماۋى مەنى عانا ەمەس، كوپشىلىكتى الاڭداتاتىنى راس!
نەگە بۇل ماسەلە ءالى كۇنگە دەيىن ءوز شەشىمىن تابا الماي وتىر؟..
قۇدايعا شۇكىر، اۋىزىن ايعا بىلەگەن ۇلى ەل ەكەنىمىز راس قوي!
تاۋەلسىزدىگىمىزدى تورتكۇل دۇنيەگە مويىنداتقانىمىز راس قوي!
قازاقستان ەلى تۇعىرى بيىك تاۋەلسىز ەكەنى راس قوي!
تاۋەلسىزدىگىمىزگە 30 جىل تولعانى راس قوي!
شىنىمەن وسىنىڭ ءبارى راس بولسا، قازاق جەرىندەگى ۇيعىر اۋدانى اتاۋىن قازاقشاعا اۋىستىرۋعا نە كەدەرگى؟…
وسىنىڭ ءبارى راس بولسا، نەدەن نەمەسە نەگە ءبىز جالتاقتايمىز؟!!!…
تۇسىنبەيمىن!…
(P.S. مۇمكىن مەنىڭ مي-اقىلىم ءالى پىسپەگەن بولار…)
اتالارىمىزدان قالعان جاقسى ءسوز بار!
«وزىڭە-ءوزىڭ مىقتى بول، قوڭسىڭدى (كورشىڭدى) ۇرى تۇتپا!!!»
"ادىرنا" ۇلتتىق پورتالى
