NURLAN ALBAN: Túsinbeıtin bir nársem bar…Nege ol - uıǵyr aýdany?

2169
Adyrna.kz Telegram

Óz basym saıasatker nemese memleket qaıratkeri emespin. Tek qana qazaq óneriniń sapynda júrgen-qatardaǵy jaýyngermin.
Eń bastysy - Qazaqstan degen uly memlekettiń tolyq qandy azamatymyn! Eger men QR-nyń tolyq qandy azamaty bolǵanym ras bolsa, ıaǵnı men óz elim men óz jerimde kókeıimde júrgen oıymdy ortaǵa salýǵa tolyq quqyǵym bar dep esepteımin!
Osyndaı maǵan el men jerdi, memleketti násip etken jaratýshyǵa san myń shúkirshilikter aıtamyn!
Demek, qazirgi qaǵaz betine túsirip otyrǵan oıym úshin meni eshkim synap-mineı qoımas degen oıdamyn…
Qudaıǵa shúkir, egemen el bolyp, qazaq eliniń kók baıraǵynyń kókte jelbiregenine de 30 jyl bolyp jatyr. Kelip jetken táýelsizdiktiń arqasynda qandaı turǵyda bolmasyn kózimizdiń ashylǵany ras! Kóptegen dúnıege de qol jetkeni taǵy bar.
Desek te… 30 jylda elimizde áli de bolsa óz sheshimin tappaǵan kóptegen máselelerdiń baryn el-jurt jaqsy biledi jáne sol úshin alańdaıdy! Ol - qazaq jerindegi jer-sý attary. Meniń aıtpaǵym, alysqa barmaı-aq meniń týyp ósken mekenim - Narynqol aýdanymen qoltyqtas jatqan Uıǵyr aýdany!…
(P.S. Aıta bersek kelmeske ketken Keńes odaǵynan qalǵan kóptegen ataýlar bar ǵoı…)
Sonymen, nege ol - uıǵyr aýdany?…
Bilem! Ol jerdi mekendeıtin eldiń ortasynda uıǵyr ultynyń bar ekenin.
Bilem! Uıǵyr aǵaıynnyń qazaq baýyrlarǵa yqylasynyń joǵary ekenin.
Bilem! QR-nyń kóp ultty, tutas memleket ekenin.
Bilem! Bárimizdiń ıisi bir - musylman ekenimizdi.
Bilmeıtin jáne túsinbeıtin bir nársem bar… Nege ol - uıǵyr aýdany?…
Men bul oıymmen ultarazdyq túsinispeýshilik týǵyzaıyn dep otyrǵan joqpyn. Nemese, uıǵyr aǵaıyndardy shettep jatqan joqpyn. Ómir súrsin, órkendesin. Nıettes baýyrmyz ǵoı.
Aıtpaǵym, osy aýdannyń ataýyn ózgertý jóninde burynnan beri aqyly asqan aǵa-apalarymyz ben saıasatker, qoǵam jáne memleket qaıratkerleri de kóptegen usynystar jasady. Biraq… ol Memleket basynda otyrǵan arqa súıer aǵa-apalarymnyń qulaǵyna jetse de, osyǵan nazar aýdarmaýy meni ǵana emes, kópshilikti alańdatatyny ras!
Nege bul másele áli kúnge deıin óz sheshimin taba almaı otyr?..
Qudaıǵa shúkir, aýyzyn aıǵa bilegen uly el ekenimiz ras qoı!
Táýelsizdigimizdi tórtkúl dúnıege moıyndatqanymyz ras qoı!
Qazaqstan eli tuǵyry bıik táýelsiz ekeni ras qoı!
Táýelsizdigimizge 30 jyl tolǵany ras qoı!
Shynymen osynyń bári ras bolsa, qazaq jerindegi Uıǵyr aýdany ataýyn qazaqshaǵa aýystyrýǵa ne kedergi?…
Osynyń bári ras bolsa, neden nemese nege biz jaltaqtaımyz?!!!…
Túsinbeımin!…
(P.S. Múmkin meniń mı-aqylym áli pispegen bolar…)
Atalarymyzdan qalǵan jaqsy sóz bar!
«Ózińe-óziń myqty bol, qońsyńdy (kórshińdi) ury tutpa!!!»

"Adyrna" ulttyq portaly

Pikirler