شىمكەنت قالالىق №13 ەمحاناسىندا كوروناۆيرۋس ينفەكتسياسىنا قارسى رەۆاكتسيناتسيا ءىس-شاراسى باستالدى.
امەريكالىق Pfizer ۆاكتسيناسىنىڭ ءىى كومپونەنتى مەن QazVak ەكپەسىنىڭ ءىىى كومپونەنتى سالىندى. العاشقى ەكپە وسىدان 9 اي بۇرىن باستالعان. وسى جولى ازاماتتار ءىىى كومپونەنتىن سالدىرۋعا كەلدى.
كاريما رايىمقۇلوۆا ەمىزۋلى جاس انا. 21 كۇن بۇرىن Pfizer ۆاكتسيناسىن العان. ەندى ەكىنشى بولىگىن سالدىرۋ ءۇشىن ەمحاناعا كەلىپ وتىر. ۆاكتسينا الۋعا ەشكىم قارسى بولماپتى. جولداسى پوليتسيا قىزمەتكەرى. ول دا ۆاكتسينا قابىلداعان. سوندىقتان جاس وتباسى دەنساۋلىعى ءۇشىن وسىنداي شەشىمگە كەلگەن.
تەراپەۆت دارىگەر اياجان وسكەنبەك ەكپە سالاتىن ازاماتتىڭ قان قىسىمى، دەنە قىزۋى، ساتۋراتسياسى ولشەنىپ، تاماعى تەكسەرىلەتىنىن ايتتى. سوسىن ەكپە الىپ بولعان سوڭ ارنايى بولمەدە جارتى ساعات دەنساۋلىعى باقىلاۋعا الىنادى. دارىگەر ۆاكتسينا العان ازاماتتار 3 كۇن شومىلمايدى، سپيرتتىك جانە گازدالعان سۋسىندار ىشپەۋ كەرەك، دەنساۋلىعىنا قاراپ، كوپ سۇيىقتىق ىشكەن ءجون دەگەن كەڭەس بەردى.
سانيتارلىق ەپيدەميولوگيالىق قاداعالاۋ باسقارماسىنىڭ اباي اۋدانى بويىنشا باسشىسى كلارا ادىرباەۆانىڭ مالىمەتىنشە 205 ادام ۆاكتسينانىڭ ءىىى كومپونەنتىن العان. جوسپار بويىنشا اباي اۋدانىنان 12-17 جاستاعى جاستار، ەكىقابات جانە ەمىزۋلى ايەلدەردى قوسقاندا جالپى سانى 33 مىڭ ادام Pfizer ۆاكتسيناسىن الۋ كەرەك. بۇگىنگى تاڭدا 2 مىڭعا جۋىق ازامات امەريكالىق ۆاكتسينانىڭ ءى كومپونەنتىن سالدىرىپ ۇلگەردى.
Pfizer ۆاكتسيناسى قويمادا -90 گرادۋستا، ال ەمحانادا - 25 گرادۋستا، سالدىرۋدان 2 بۇرىن - 2.8 گرادۋستا ساقتالادى. جانە فلاكون 6 ساعاتقا عانا جارايدى. ال وتاندىق QazVak ەكپەسى جۋىردا دۇنيەجۇزىلىك دەنساۋلىق ساقتاۋ ۇيىمىنىڭ ارنايى سەرتيفيكاتسياسىنان ءوتتى.
ءانۋار جۇماشباەۆ
