شىمكەنت قالاسىندا قر تاۋەلسىزدىگىنىڭ 30 جىلدىعى قارساڭىندا قازاق تەاترىنىڭ تۇڭعىش رەجيسسەرى جۇمات شانينگە ارنالعان ەسكەرتكىش اشىلدى.
ەڭسەلى ەسكەرتكىشتىڭ اشىلاۋىنا قالا اكىمى مۇرات ايتەنوۆ، قالا ءماسليحاتىنىڭ حاتشىسى مەن دەپۋتاتتارى، ج.ءشانيننىڭ ۇرپاقتارى جانە زيالى قاۋىم وكىلدەرى قاتىستى.
ۇلتتىڭ ۇلى تۇلعالارىنا قۇرمەت كورسەتۋ پەرزەنتتىك پارىز ەكەنىن العا تارتقان م.ايتەنوۆ جيىلعان قاۋىمدى تاۋەلسىزدىك مەرەكەسىمەن قۇتتىقتادى.
–شىمكەنت تەاترى جۇمات شانين ەسىمىن 1972 جىلى يەلەندى. اراعا 50 جىل سالىپ، تەاتر الدىنا قايراتكەردىڭ ەڭسەلى ەسكەرتكىشى تۇعىرعا قوندى. قازاق تەاتر ونەرىنىڭ ۇستازى بولعان تۇلعانىڭ عيبراتتى عۇمىرى مەن مول مۇراسى – حالقىمىزدىڭ اسىل قازىناسى. جۇمات شانينگە قۇرمەت كورسەتۋ ارقىلى ءبىز مادەنيەت قايراتكەرلەرىنە قۇرمەت كورسەتەمىز. ۇلت تاريحىنداعى العاشقى كاسىبي تەاتر مامانىنىڭ ومىرلىك تانىمى – وسكەلەڭ ۇرپاقتىڭ بوي تۇزەر باعىتى بولاتىنىنا سەنىمدىمىن. بارشاڭىزدى شىمكەنتتىڭ مادەني ومىرىندەگى ەرەكشە ساتپەن قۇتتىقتايمىن!
ەلىمىز امان، تاۋەلسىزدىگىمىز تۇعىرلى بولسىن!-دەدى قالا اكىمى.
جۇمات شانين اتىنداعى اكادەميالىق قازاق دراما تەاترىنىڭ الدىنا ورناتىلعان ەسكەرتكىشتىڭ بيىكتىگى تۇعىرىمەن قوسقاندا 5 مەترگە جۋىقتايدى. اۆتورى – قر مادەنيەت قايراتكەرى، قر سۋرەتشىلەر وداعىنىڭ مۇشەسى ءابدۋاحات مۇراتباەۆ.
قازاقستانداعى تۇڭعىش قازاق تەاتر ونەرىنىڭ نەگىزىن قالاعان، ونى كاسىبي دەڭگەيدە قالىپتاستىرىپ، شىعارماشىلىق جاعىنان ءوسۋ جولىندا زور ەڭبەك سىڭىرگەن تۇلعانىڭ تۋعانى بيىل 129 جىل.
شىمكەنت قالاسى اكىمدىگىنىڭ ءباسپاسوز قىزمەتى
