ءال-فارابي قالالىق عىلىمي-امبەباپ كىتاپحاناسىنىڭ ونەر ادەبيەتى ءبولىمىنىڭ قىزمەتكەرلەرى «قىلۋەت» ەتنومۋزەيىنە ساياحات ۇيىمداستىردى.
«رۋحاني جاڭعىرۋ» باعدارلاماسىنىڭ «ۇلى دالانىڭ ەجەلگى ونەرى جانە تەحنولوگيالار مۋزەيى» ارنايى جوباسى اياسىندا ۇيىمداستىرىلعان ساياحاتتا وقۋشىلار «قىلۋەت» ەتنومۋزەيىنىڭ اۆتورى، قازاقستان ديزاينەرلەر جانە سۋرەتشىلەر وداعىنىڭ مۇشەسى، ەتنوگراف – كەندەباي قارابدالوۆپەن كەزدەستى.
قىلۋەتتىڭ ىشىندەگى العاشقى بولمە – «قىش كىتاپتار بولمەسى»، ەكىنشىسى – «ماحاببات بولمەسى، ودان كەيىنگى بولمە – مەشىت، كەلگەن ادامدار بۇل جەردە وتىرىپ قۇران وقيدى. «اسپان مەن جەردىڭ اراسى» دەپ اتالاتىن ەڭ سوڭعى بولمەدە توبەدەگى ارنايى تەسىكتەن جارىق ءتۇسىپ، تەمپەراتۋرا كۇنى-ءتۇنى 25 گرادۋس بولىپ تۇرادى. ەتنومۋزەيدىڭ باسقا بولىگى ەجەلگى ورتاعاسىرلىق ادىسپەن سالىنعان.
قازاقستانداعى قولدانبالى ارحەولوگيانىڭ نەگىزىن قالاۋشى، كونە وتىراردىڭ قۇمىراشىلىق كاسىبىنىڭ تەحنولوگياسى مەن ءداستۇرىن قالپىنا كەلتىرۋمەن اينالىساتىن كەندەباي اعانىڭ ونەرىنە جاس وقىرماندار ءتانتى بولىپ، كەرەمەت اسەر العاندارىن جەتكىزدى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
