«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەلباسىنىڭ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىعىنا ەنگىزىلگەن وزگەرىستەرگە قاتىستى پىكىر ءبىلدىردى، دەپ جازادى Qamshy.kz اقپارات اگەنتتىگى.
ماۋلەن اشىمباەۆتىڭ ايتۋىنشا، جاڭا نۇسقا حالىقتىڭ وي ەلەگىنەن وتكەن، بارلىق پىكىرلەر ەسكەرىلىپ، ناقتى دايەكتەرگە سۇيەنگەن ستراتەگيالىق شەشىم.
– ەلباسى جارلىعىنا ەنگىزىلگەن وزگەرىستەر قازاق ءتىلىن حالىقارالىق دەڭگەيگە جاقىنداتاتىن، ۇلتتىق فونەتيكامىزدىڭ اياسىن كەڭەيتەتىن سول ارقىلى قازاق قارىپتەرىن الەمنىڭ ءار تۇكپىرىندە تانىپ، بىلۋگە مۇمكىندىك بەرەتىن نەگىزگى تەتىك دەپ ەسەپتەيمىن، – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
سونىمەن قاتار ماۋلەن اشىمباەۆ جازۋ-سىزۋ ءتىلدىڭ ەڭ نازىك سالالارىنىڭ ءبىرى ەكەنىن ايتتى. سوندىقتان بۇل ماسەلە بۇكىلحالىقتىق تالقىلاۋعا ۇسىنىلىپ، ساليقالى وي، سالماقتى پىكىرلەرمەن بىرگە سىني كوزقاراستار دا ايتىلعانى بەلگىلى.
بۇل جونىندە «نۇر وتان» پارتياسى توراعاسىنىڭ ءبىرىنشى ورىنباسارى:
– حالىقتىڭ اتالعان ماسەلەگە قىزۋ پىكىر ءبىلدىرىپ، ءوز ويلارىن ەركىن ايتۋى كوڭىل قۋانتارلىق جاعداي. بۇل حالىقتىڭ ساياسي، الەۋمەتتىك دەڭگەيى مەن جاۋاپكەرشىلىگىنىڭ ارتقانىن كورسەتەتىن قۇبىلىس. سول سەبەپتى، بۇگىنگى نۇسقانى قوعامنىڭ تالاپ-تىلەكتەرى مەن پىكىرلەرىنىڭ ناتيجەسى دەپ بىلەمىن، – دەدى.
ەنگىزىلگەن سوڭعى وزگەرىستەردىڭ ناتيجەسىندە قازاق ءالىپبيى بۇرىنعىدان دا قولايلى ءارى ءتيىمدى بولا تۇسپەك. ماۋلەن اشىمباەۆتىڭ سوزىنە قاراعاندا، جاڭا نۇسقا اقپاراتتىق تەحنولوگياعا بەيىمدەلگەن ءارى يننوۆاتسيا تالاپتارىنا ساي جانە الەمدىك تاجىريبەدە كەڭىنەن قولدانىلادى. ماسەلەن، پورتۋگال، فرانتسۋز، چەح تىلدەرىندە دياكريتيكالىق تاڭبالار بار.
سونداي-اق، «نۇر وتان» پارتياسى توراعاسىنىڭ ءبىرىنشى ورىنباسارى بۇگىندە ەلىمىزدە جۇزەگە اسىرىلىپ جاتقان ساياسي، ەكونوميكالىق، الەۋمەتتىك جانە رۋحاني جاڭعىرۋ ۇدەرىسىندە ءتىلىمىزدىڭ دە جاڭا بەلەسكە كوتەرىلۋى كەمەل كەلەشەكتىڭ كورىنىسى ەكەنىن اتاپ ءوتتى.
– لاتىن ءالىپبيى ەڭ الدىمەن حالقىمىزدىڭ باسەكەگە قابىلەتتىلىگىن ارتتىرىپ، پراگماتيكالىق سانانىڭ ورنىعۋىنا داڭعىل جول اشادى. تسيفرلىق تەحنولوگيانىڭ ەركىن ەنۋىنە، يننوۆاتسياعا بەيىمدەلۋگە، ءبىلىمنىڭ سالتانات قۇرۋىنا ۇلكەن ۇلەس قوسادى. بۇل يگى باستاما ۇلتتىق بىرەگەيلىكتى ساقتاپ، سانامىزعا تىڭ سەرپىن بەرەتىنى ءسوزسىز، – دەدى ماۋلەن اشىمباەۆ.
qazaquni.kz
