بايقوڭىر قالاسىنىڭ بارلىق مەكتەبىندە قازاق ءتىلى مەن قازاقستان تاريحى وقىتىلادى. بۇل تۋرالى قىزىلوردا وبلىسى اكىمى گۇلشارا ابدىقالىقوۆا ايتتى، دەپ حابارلايدى "ادىرنا" ۇلتتىق پورتالى.
- ءبىز بايقوڭىر قالاسىنىڭ مەكتەپتەرىندە قازاق ءتىلى، قازاق ادەبيەتى مەن قازاقستان تاريحىن وقىتۋ جايلى كەلىستىك. بۇل پاندەر رەسەيلىك جانە قازاقستاندىق ستاندارتتار بويىنشا وقىتاتىن مەكتەپتەردە ەنگىزىلەدى", - دەدى ابدىقالىقوۆا ۇكىمەت كۋلۋارىندا.
ايتۋىنشا، بۇل ماسەلە كوپتەن بەرى تالقىلانىپ ءجۇر.
- ءبىزدىڭ مەكتەپتەردە، رەسەي مەكتەپتەرىندە قازاق بالالارى وقيدى. ءبىزدىڭ بۇلدىرشىندەر ءۇشىن ءوز ءتىلى مەن تاريحىن تانۋ جانە ۇيرەنۋ جاڭا باستاما بولادى دەگەن ويدامىن، - دەدى وبلىس اكىمى.
ەستەرىڭىزگە سالا كەتەيىك، رەسەي بايقوڭىردى قازاقستاننان جالعا الىپ وتىر. قازىر ەكى ەلدىڭ ءبىلىم مينيسترلىكتەرى جۇمىس مەحانيزمىن پىسىقتاپ جاتىر. قىزىلوردا وبلىسى ءوز تاراپىنان مەكتەپتەردى بىلىكتى مۇعالىمدەرمەن، وقۋلىقتارمەن، قاجەتتى ماتەريالدارمەن قامتاماسىز ەتەدى.
"ادىرنا" ۇلتتىق پورتالى
