سولتۇستىك قازاقستان وبلىسىندا 53 كوپقاباتتى ءۇي سالىنىپ جاتىر، ونىڭ 23-ءى جەكە قۇرىلىس سالۋشىلار ەسەبىنەن. 3,5 مىڭ پاتەر پايدالانۋعا بەرىلەدى. جاڭا باسپانانى 12 مىڭ سولتۇستىكقازاقستاندىق الادى.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ءوڭىر باسشىسى قۇمار اقساقالوۆ مالىمدەدى.
بيىل 340 مىڭ شارشى مەتر تۇرعىن ءۇي پايدالانۋعا بەرىلەدى. الداعى جىلعا 400 مىڭ شارشى مەتر سالۋ جوسپارلانىپ وتىر. مۇنىڭ نەگىزى جاڭا جانە وتپەلى جوبالار بولادى.
«جاس وركەن»، «بەرەكە» جانە «ورتالىق» شاعىن اۋداندارىن سالۋ جالعاسۋدا. كەزەكتە – «قوپاي» جانە «جاعالاۋ». جاڭا جوندەۋ باعدارلاماسى اپاتتىق جانە ەسكىرگەن تۇرعىن ۇيلەردى بۇزۋعا مۇمكىندىك بەرەدى. قالا بويىنشا بارلىعى 1,7 مىڭنان استام ەسكى جانە اپاتتى ۇيلەر ءسۇرىلىپ، 6 مىڭنان استام قالا تۇرعىنىنىڭ تۇرمىستىق جاعدايىن جاقسارتۋعا كومەكتەستى. سونداي-اق جەكە تۇرعىن ءۇي قۇرىلىسى دا دامىپ كەلەدى. «سولنەچنىي-2» جانە «يۋجنىي» شاعىن اۋداندارىنا بارلىق قاجەتتى ينفراقۇرىلىم جۇرگىزىلۋدە. سۋ قۇبىرى، جولدار جانە ەلەكتر جەلىلەرى تارتىلىپ جاتىر. 3 مىڭ دايىن جەر ۋچاسكەسى جتق كەزەگىندە تۇرعاندارعا بەرىلەدى. الداعى 5 جىلدا 2,3 ملن شارشى مەتر تۇرعىن ءۇي سالۋ جوسپارلانعان. بۇل 21 مىڭنان استام پاتەر. 70 مىڭ ادام ءوز باسپاناسىنا يە بولادى. بۇل وبلىستىڭ ءاربىر جەتىنشى تۇرعىنى. تاۋەلسىزدىك جىلدارىندا وبلىستا 5 ملن شارشى مەتردەن استام تۇرعىن ءۇي پايدالانۋعا بەرىلدى»، - دەپ قورىتىندىلادى سپيكەر.
"ادىرنا" ۇلتتىق پورتالى
