تاۋەلسىزدىكتىڭ 30 جىلدىعىنا وراي «Ten qogam» الەۋمەتتىك قولداۋ ورتالىعى اشىلدى. بۇل ورتالىق مۇمكىندىگى شەكتەۋلى ازاماتتارعا ءتۇرلى قىزمەتتەر كورسەتىپ، ولاردىڭ باس قوساتىن ورنىنا اينالماق. قالا اكىمى مۇرات ايتەنوۆ ورتالىقتى ارالاپ، وندا كورسەتىلەتىن قىزمەتتەرمەن تانىسىپ شىقتى.
م.ايتەنوۆتىڭ ايتۋىنشا، مۇمكىندىگى شەكتەۋلى ازاماتتارعا قولداۋ كورسەتۋ – مەملەكەتتىڭ الەۋمەتتىك ساياساتىنىڭ باسىم باعىتتارىنىڭ ءبىرى. ولارعا مەملەكەتتىك جاردەماقىمەن قوسا مەديتسينالىق وڭالتۋ جانە ەم تۇرلەرى كورسەتىلەدى. الەۋمەتتىك پورتال ارقىلى كومەكشى قۇرالدارمەن تولىق قامتاماسىز ەتىلەدى.
–شىمكەنت قالاسىندا 36 مىڭنان استام مۇمكىندىگى شەكتەۋلى جان ءومىر سۇرۋدە. ونىڭ ىشىندە 6 مىڭنان استامى كامەلەت جاسقا تولماعاندار. ءبىز ولارعا وزدەرىن قوعامنىڭ تولىققاندى مۇشەسى ەكەنىن سەزىندىرۋمىز قاجەت. بۇل رەتتە مۇگەدەكتەردى وڭالتۋ مەن ولاردى قوعامعا كىرىكتىرۋ مىندەتتەرىن ساپالى جۇزەگە اسىرۋدىڭ ماڭىزى زور. بۇگىن اشىلىپ وتىرعان الەۋمەتتىك قولداۋ ورتالىعى اتالعان مىندەتتى ورىنداۋعا سەپتىگىن تيگىزەدى، – دەدى مۇرات دۇيسەنبەكۇلى.
«تەڭ قوعام» الەۋمەتتىك قولداۋ ورتالىعى «ءبىر تەرەزە» قاعيداسىمەن 5 باعىتتا قىزمەت كورسەتەدى. مۇندا دارىگەر مەن پسيحولوگ جۇمىس ىستەيدى. مۇمكىندىگى شەكتەۋلى ازاماتتاردى جۇمىسقا ورنالاستىرۋعا باسا نازار اۋدارىلعان. سونداي-اق، بۇل جەردە مۇمكىندىگى شەكتەۋلى ازاماتتار الەۋمەتتىك پورتالدىڭ قىزمەتىن ءوز بەتىنشە الۋدى ۇيرەنۋىنە بولادى.
ايدار قۇلجانوۆ،
فوتو سەرىك قوساەۆ.
