ەرتەدە ادامدار ۇزاق جولعا ساپار شەگەر ساتتە، جولىنان اداسپاۋ ءۇشىن جۇلدىزداردى باعىتتاۋشى سىزبا رەتىندە قولدانعان ەكەن.سول سياقتى ەلدىكتىڭ جەتى تۇعىرىن –ەلىمىزدىڭ دامۋ جولىنا باعىتتايتىن جەتى قاراقشى جۇلدىزى ىسپەتتەس، جول نۇسقاۋشى سىزبا دەۋگە كەلەدى. ەل بولىپ ەس جيعالى رۋحاني بولمىسىمىزبەن مادەنيەتىمىز جارىسا دامىپ، قازىرگى ساعات ساناپ ىلگەرىلەپ جاتقان الەمدىك دامۋ تولقىنىمەن ۇشتاسىپ كەلەمىز. بۇل ەڭ الدىمەن ەڭبەكقور حالقىمىزبەن، ەلىن سۇيگەن ەلباسىمىزدىڭ 30 جىلعا تاياۋ ەڭبەگىنىڭ ارقاسى. وسى ورايدا ەلباسىمىز ەلىن سۇيگەن، لايىقتى كوشباسشى رەتىندە وسكەلەڭ ۇرپاققا باعىت-باعدار بەرىپ، قولداۋ ماقساتىندا «ەلدىكتىڭ جەتى تۇعىرى» اتتى ءوز ۇندەۋىن جولدادى.
«ەلدىكتىڭ جەتى تۇعىرى» - ەلباسىمىزدىڭ 30 جىلدىق تاجىريبەسىمەن، ەلگە دەگەن جاناشىرلىعى جانە سۇيىسپەنشىلىك كەڭەسىنىڭ جيىنتىعى.
ەلباسىمىز ءبىرىنشى تۇعىردا، تاۋەلسىزدىگىمىزدىڭ ەڭ ۇلى، ەڭ قاستەرلى قۇندىلىعىمىز ەكەنىن ايتقان. «ءوز ءۇيىم ولەڭ توسەگىم»- دەپ دانا حالقىمىز ايتقانداي، ءار ۇلتتىڭ ءوز مەملەكەتى، ءوز مەكەنى بولعاننان ارتىق باقىت جوق شىعار. اتا –بابامىزدىڭ ارمانى بولعان، قانشاما باتىرلارىمىزدىڭ قانىمەن،تەرىمەن كەلگەن ۇلى تاۋەلسىزدىگىمىزدى ، جەر كولەمى بويىنشا الەمدە 9-شى ورىن الاتىن كەڭ بايتاق جەرىمىزدى ساقتاۋ، ءاربىر ازاماتتىڭ پارىزى ەكەنىن ايتقان. سونىمەن قوسا تاۋەلسىزدىگىمىزدى ساقتاۋ، ماڭگىلىك ەتۋ وسكەلەڭ ۇرپاققا اماناتتالاتىنىن، وسى جولدا جاس ۇرپاق ارقاشان ەڭبەككە دايىن بولۋى كەرەكتىگىن اتاپ كورسەتكەن.
ەكىنشى تۇعىرىندا، بىرلىك پەن كەلىسىم- ەلىمىزدىڭ تۇراقتى تۇعىرى ەكەنىن ايتقان. ءبىر تۋدىڭ استىندا قانشاما ۇلتتى بىرىكتىرۋ، باۋىرمالدىققا باۋلۋ ەڭ الدىمەن ەلىمىزدىڭ اق كوڭىلى، دارحان پەيىلىنىڭ، قازاقستان حالقى اسسامبلەياسىنىڭ الەۋەتىنىڭ جانە ەلباسىمىزدىڭ ساليحالى ساياساتىنىڭ ارقاسى دەپ بىلەمىن. بىرلىكپەن عانا ەل بولىپ، بايتاق مەكەنىمىزدى ماڭگىلىك ەتەتىنىمىزدى اتاپ ايتقان.
ءۇشىنشى تۇعىرىندا، جەر-اتا-ابامىزدان قالعان قاستەرلى مۇرا، حالىق قازىناسى ەكەنىن ايتقان. ەجەلدەن جەرىمىز جانمەن قۇنداس قاستەرلى، قاسيەتتى ۇعىم. تاۋەلسىزدىگىمىز جاريالانا سالا ەلباسىمىز وسىناۋ الپاۋىت ەلدەردىڭ اراسىنان، ۇشقىر ساياساتكەرلىگىنىڭ ارقاسىندا، اتا-بابا اماناتىنا ادال بولىپ ەڭ ءبىرىنشى شەكارامىزدى بەكەمدەدى. بۇل ەلىمىزدىڭ دامۋ جولىنداعى ەڭ ۇتىمدى قادام. ەندىگىدە وسكەلەڭ ۇرپاققا جەرىمىزدى قاستەرلەپ، كوز قاراشىعىنداي ساقتاپ،ازاتتىعىمزدى ماڭگىلىك ەتۋدى وسيەتتەپ، ميراس ەتۋ بورىشىمىز ەكەنىن ايتتى.
ءتورتىنشى تۇعىرىندا، وتباسى مەن سالت-ءداستۇر – قوعامنىڭ التىن دىڭگەگى ەكەنىن ايتقان. «وتان – وتباسىدان باستالادى» - دەپ دانا حالقىمىز بەكەر ايتپاعان. وتان سۇيگىشتىك تۋعان ولكەڭدەگى وتباسىڭ، ەلىڭ ءتىپتى ۇشقان قۇسپەن اققان بۇلاق سىڭعىرىنا دەگەن سۇيىسپەنشىلىكتەن باستاۋ الادى. وتباسى قۇندىلىعى ساقتالسا بۇكىل سالت-ءداستۇر، ادەت-عۇرىپتىڭ ساقتالعانى. اقىل، جۇرەك، قايرات، نامىس، ادالدىققا سۇيەنە وتىرىپ ءداستۇرىمىزدىڭ يگىسىن وزدىرىپ، بۇرىسىن توزدىرىپ سانالى ءومىر ءسۇرۋىمىز قاجەت ەكەنىن جەتكىزگەن.
بەسىنشى تۇعىرىندا، ەلباسىمىز ۇلتتىق مادەنيەت – حالىقتىڭ رۋحاني تىرەگى دەپ اتاعان. تاريح قويناۋىن اقتارار بولساق، ءبىز-كوشپەندى، بولمىسى ەرەكشە، رۋحاني-مادەني مۇرالارعا باي حالىقپىز. مادەنيەت ءبىزدىڭ تەرەڭنەن كەلە جاتقان تاربيەمىز، ونە بويىمىزداعى بۇكىل قاسيەتتەر. ول قاسيەتتەردىڭ يگى جيىنتىعى مەن مادەني، رحاني قۇندىلىقتارى دامىعان 30 ەلدىڭ قاتارىنا قوسىلۋىمىزعا سەپتىگىن تيگىزەدى. ەلىمىزدى ونەر قۇدىرەتىمىزبەن، عىلىمي جەتىستىكتەرىمىزبەن مويىنداتۋعا مۇمكىندىگىمىز بار ەكەنىن كورسەتكەن.
التىنشى تۇعىرىندا، ءبىلىم مەن ەڭبەك – باقۋاتتى ءومىردىڭ كىلتى. «وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ» دەپ دانا اباي ايتقانداي، ءبىز تەك ءوز ءبىلىمىمىز بەن كۇشىمىزگە سەنۋىمىز كەرەك دەگەن. قازىرگى تاڭدا ءوز ونەرىمەن، بىلىمىمەن ەلدىڭ اتىن تانىتىپ جۇرگەن دارىندى جاستارىمىز وتە كوپ. مىنە وسىنىڭ ءبارى ءبىلىم مەن ەڭبەكتىڭ ناتيجەسى. ەلدىڭ ءۇمىتىنىڭ اقتالعانىن جانە ادال ەڭبەكپەن، ۇشقىر ءبىلىمنىڭ ارقاسىندا عانا ۇلى جەتىستىكتەرگە جەتە الاتىنىمىزدى اتاپ وتكەن.
جەتىنشى تۇعىرىندا پراگماتيزم – باسەكەگە قابىلەتتى بولۋدىڭ كەپىلى دەيدى ەلباسىمىز. قولىمىزدا بار مۇمكىندىكتەر اياسىندا، ءتيىمدى جولداردى تاڭداپ ۇزدىك ناتيجەلەرگە جەتىپ، ەلىمىزدىڭ دامۋىنا ۇلەس قوسۋعا مۇمكىندىكتەر مول. سوندىقتان پراگماتيزم قاعيداتتارى بويىنشا، ياعني قاناعاتشىل، ۇنەمشىل، ۇستامدى بولىپ ۋاقىتتى ۇنەمدى پايدالانعاننىڭ ءجون ەكەنىن، وسىلايشا ءبىز تاۋەلسىزدىگىمىزدى باياندى ەتىپ، ەل تۇتاستىعىن ساقتاپ، وتباسىلىق قۇندىلىقتاردى جاڭعىرتىپ، ۇلت مادەنيەتىن ناسيحاتتاپ، تەرەڭ ءبىلىم مەن ادال ەڭبەككە دەن قويعان جاسامپاز ەل بولاتىنىمىزدى ايتقان.
ەلباسىمىز ن.ءا.نازارباەۆتىڭ جولداۋلارى ءار دەم، ءار ءسات ناعىز كەرەك كەزىندە جەتكەن. بۇل جولى دا رۋحاني، ماڭىزدى ۇندەۋىمىز ءوز ارناسىن تاۋىپ، ەل يگىلىگى جولىندا ساپارعا شىققان، ەلىم دەپ سوققان جۇرەكتەرگە جالاۋ بولىپ، ەل يگىلىگىنە باعىتتايدى دەپ سەنەمىن.
ەلىمىزدىڭ تۇعىرى بيىك بولىپ، كوك تۋىمىز ماڭگى جەلبىرەسىن!
شىمكەنت قالالىق ءماسليحات دەپۋتاتى، “Nur Otan” پارتياسىنىڭ فراكتسيا مۇشەسى سۋلتانوۆا تورەايم جولدىبايقىزى!
