باقىتگۇل حامەنوۆانىڭ ءسىڭلىسى مالىمدەمە جاسادى

13749
Adyrna.kz Telegram

«پارا الدى» دەگەن كۇدىكپەن ۇستالعان اتىراۋ وبلىسى اكىمىنىڭ ورىنباسارى باقىتگۇل حامەنوۆانىڭ ءسىڭلىسى اينۇر حامەنوۆا وقيعاعا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.

«قىمباتتى دوستار! وتباسىمىز ءۇشىن جايسىز تيگەن وقيعاعا بايلانىستى قولداۋلارىڭىزدى ءبىلدىرىپ، جىلى سوزبەن دەمەپ جاتقاندارىڭىز ءۇشىن بەك راقمەت! عايباتتىڭ جەتى اتاسىن جاۋدىرىپ، سانسىز ساۋاپقا يە قىلىپ جاتقان "تىلەۋلەستەرگە دە" راقمەت! اكە مەن شەشەنىڭ ادال تاربيەسىن كورگەن، ىزگى ىستەرىمەن تالاي جاننىڭ، تالاي يگىنىڭ باتاسىن، العىسىن العان اپام باقىتگۇلگە ءبىر اللا ءوزى جار بولسىن. "اللانىڭ بەرگەنىنە قاناعات" دەگەن ۇيادا وسكەن اپامنىڭ وسى كەزگە دەيىن سۇيەنگەنى دە، سەنگەنى دە - ءبىر اللا. ەكى بالاسىنا، تۋعان-تۋىستارىنا كوڭىل بولەتىن ۋاقىتى بولماي، جاۋاپكەرشىلىكپەن ەڭبەك ەتكەنىنە كوبىڭىز كۋاسىز. ءالى-اق رەتتەلەر جاعداي. جىعىلعان كەزدە جۇدىرىقتاماي، سۇرىنگەن ساتتە سىناماي، جاي عانا ادام بولىپ، تىلەۋلەستىك تانىتقان ارقايسىسىڭىزعا اللا رازى بولسىن!»– دەدى ول.

ەسكە سالا كەتەيىك، 10 جەلتوقساندا اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقاليەۆتىڭ 5 ميلليون تەڭگە كولەمىندە پارا الدى دەگەن كۇدىكپەن ۇستالعاندارى بەلگىلى بولعان ەدى.

«ادىرنا» ۇلتتىق پورتالى

پىكىرلەر