اتىراۋدا كوپىردەن سەكىرمەك بولعان ءجاسوسپىرىمدى پوليتسەيلەر قۇتقارىپ قالدى، دەپ حابارلايدى «ادىرنا» ءتىلشىسى.
«12 جەلتوقسان كۇنى 22:20 شاماسىندا “102” وپەراتورىنا اتىراۋ مولتەك اۋدانىندا ورنالاسقان كوپىردەن بەلگىسىز ادامنىڭ سەكىرىپ كەتكەنى تۋرالى حابارلاما ءتۇستى. حابارلاما بويىنشا وقيعا ورنىنا بارعان پاترۋلدىك پوليتسيا باتالونىنىڭ قىزمەتكەرلەرى يساتاي تۇرسىنعاليەۆ پەن عالىم قالباەۆ سۋعا باتىپ بارا جاتقان قىزدى بايقاعان. ۋاقىتتىڭ تىعىزدىعىن تۇسىنگەن ءتارتىپ ساقشىلارى قۇتقارۋعا كىرىستى. عالىم قالباەۆ كولىكتەن ارقان ءجىپتى الىپ، بەلىنە بايلاپ، قىزعا قاراي جۇزگەن. ارقاننىڭ ەكىنشى شەتىن يساتاي تۇرسىنعاليەۆ ۇستاپ تۇردى. كومەككە كەلگەن ارىپتەستەرى ماحامبەت قاباسوۆ پەن قۇرالبەك قالماعانبەتوۆكە ول ارقاندى ۇستاتىپ، عالىم قالباەۆتىڭ ارتىنان سۋعا ءتۇستى»،– دەلىنگەن حابارلامادا.
ءتارتىپ ساقشىلارى قىز بالانى 20 مينۋت شاماسىندا جاعاعا الىپ شىقتى. ەس-ءتۇسسىز جاتقان جاسوسپىرىمگە بىردەن جاساندى تىنىستاندىرۋ جاتتىعۋلارىن جاساۋعا كىرىستى. تىرشىلىك بەلگىلەرى بولعانىمەن، قىز قاتتى السىرەپ قالعان. پوليتسەيلەر جاقىن ماڭداعى №5 ەمحاناعا قىزمەتتىك كولىكپەن جول تارتقان.
– ويلاناتىن ۋاقىت بولمادى. “شەشىنگەن سۋدان تايىنباس” دەيدى. قۇتقارامىز دەپ بىردەن سۋعا تۇستىك. سۋ مەن ويلاعاننان دا سالقىن بولىپ شىقتى. بىراق بار ويىم باتىپ بارا جاتقان قىزدى قۇتقارۋ بولدى. ارىپتەسىم ارقاننىڭ ەكىنشى ۇشىن ۇستاپ تۇردى، كەيىن ارتىمنان ءجۇزىپ كەلە جاتقانىن سەزىپ، تەز قيمىلداپ، جاعاعا ۇشەۋمىزدىڭ دە امان-ەسەن شىعۋىمىز ءۇشىن بارلىعىن جاسادىم. ءار سەكۋند ماڭىزدى بولدى. ۆزۆود كومانديرى تەز شەشىم قابىلدادى، ءجاسوسپىرىم سالقىن سۋدا بىزدەن ۇزاق ۋاقىت بولعاندىقتان، وكپەسىنە زاقىم كەلمەسىن دەپ بىردەن ەمحاناعا جول تارتتىق، – دەدى عالىم قالباەۆ.
ايتا كەتەيىك، دارىگەرلەر 14 جاستاعى جاسوسپىرىمگە دەرەۋ كومەك كورسەتتى. ايازدى كۇنى سالقىن سۋعا ءجۇزىپ، ءجاسوسپىرىمدى اجالدان اراشالاعان ءتارتىپ ساقشىلارىنىڭ دا دەنساۋلىعىن تەكسەرىپ، قاجەتتى كومەكتەرىن كورسەتتى.
«ادىرنا» ۇلتتىق پورتالى
