Atyrauda köpırden sekırmek bolǧan jasöspırımdı poliseiler qūtqaryp qaldy, dep habarlaidy «Adyrna» tılşısı.
«12 jeltoqsan künı 22:20 şamasynda “102” operatoryna Atyrau möltek audanynda ornalasqan köpırden belgısız adamnyŋ sekırıp ketkenı turaly habarlama tüstı. Habarlama boiynşa oqiǧa ornyna barǧan patruldık polisiia batalonynyŋ qyzmetkerlerı İsatai Tūrsynǧaliev pen Ǧalym Qalbaev suǧa batyp bara jatqan qyzdy baiqaǧan. Uaqyttyŋ tyǧyzdyǧyn tüsıngen tärtıp saqşylary qūtqaruǧa kırıstı. Ǧalym Qalbaev kölıkten arqan jıptı alyp, belıne bailap, qyzǧa qarai jüzgen. Arqannyŋ ekınşı şetın İsatai Tūrsynǧaliev ūstap tūrdy. Kömekke kelgen ärıptesterı Mahambet Qabasov pen Qūralbek Qalmaǧanbetovke ol arqandy ūstatyp, Ǧalym Qalbaevtyŋ artynan suǧa tüstı»,– delıngen habarlamada.Tärtıp saqşylary qyz balany 20 minut şamasynda jaǧaǧa alyp şyqty. Es-tüssız jatqan jasöspırımge bırden jasandy tynystandyru jattyǧularyn jasauǧa kırıstı. Tırşılık belgılerı bolǧanymen, qyz qatty älsırep qalǧan. Poliseiler jaqyn maŋdaǧy №5 emhanaǧa qyzmettık kölıkpen jol tartqan.
– Oilanatyn uaqyt bolmady. “Şeşıngen sudan taiynbas” deidı. Qūtqaramyz dep bırden suǧa tüstık. Su men oilaǧannan da salqyn bolyp şyqty. Bıraq bar oiym batyp bara jatqan qyzdy qūtqaru boldy. Ärıptesım arqannyŋ ekınşı ūşyn ūstap tūrdy, keiın artymnan jüzıp kele jatqanyn sezıp, tez qimyldap, jaǧaǧa üşeumızdıŋ de aman-esen şyǧuymyz üşın barlyǧyn jasadym. Är sekund maŋyzdy boldy. Vzvod komandirı tez şeşım qabyldady, jasöspırım salqyn suda bızden ūzaq uaqyt bolǧandyqtan, ökpesıne zaqym kelmesın dep bırden emhanaǧa jol tarttyq, – dedı Ǧalym Qalbaev.Aita keteiık, därıgerler 14 jastaǧy jasöspırımge dereu kömek körsettı. Aiazdy künı salqyn suǧa jüzıp, jasöspırımdı ajaldan araşalaǧan tärtıp saqşylarynyŋ da densaulyǧyn tekserıp, qajettı kömekterın körsettı. https://youtu.be/l1F5YH_Vw5o
«Adyrna» ūlttyq portaly
