شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا باسقارماعا قاراستى «سامعاۋ سەنىم» ورتالىعىن ارالاپ، قىزمەت ساپاسىن باقىلادى. سونىمەن قاتار، قىزمەت الۋشىلارمەن تىكەلەي اڭگىمەلەسىپ، مۇڭ-مۇقتاجدىقتارىن تىڭدادى.
«سامعاۋ سەنىم» ورتالىعى تۇرمىستىق زورلىق-زومبىلىققا ۇشىراعان كوپبالالى انالارعا، از قامتاماسىز ەتىلگەن وتباسىلارعا الەۋمەتتىك كومەك كورسەتەدى. بۇگىندە داعدارىس ورتالىعىندا ءتۇرلى قيىندىقتارعا دۋشار بولعان 25 - كە جۋىق قىز-كەلىنشەك پەن بالالار قىزمەت الۋدا. بارلىعى دا الەۋمەتتىك جانە قۇقىقتىق قامقورلىققا مۇقتاج.
ايتا كەتسەك، تۇرمىستىق زورلىق-زومبىلىققا ۇشىراعان جاندارمەن مۇندا 9 باعىت بويىنشا جۇمىستار اتقارىلادى. اتاپ ايتقاندا، الەۋمەتتىك-قۇقىقتىق باعىت بويىنشا ورتالىق زاڭگەرلەرى تاراپىنان نەكە بۇزۋ، اليمەنتكە قۇجاتتى راسىمدەۋ، بالانىڭ تۋ تۋرالى كۋالىگى مەن سوت شەشىمىنىڭ كوشىرمەسىن الۋ، بۇعاتتالعان جەكە ەسەپ شوتتى اشۋ، قىزمەت الۋشىلارعا قاتىستى قىلمىستىق ءىس بويىنشا تەرگەپ-تەكسەرۋ امالدارىنا سۇيەمەلدەۋ بويىنشا قولداۋ كورسەتىلەدى. سونىمەن قاتار، پسيحولوگ ماماندار ولاردىڭ كۇيزەلىستەن شىعىپ، قايتا اياققا تۇرۋلارىنا كاسىبي تۇرعىدا جاردەمدەسەدى.
جالپى «سامعاۋ سەنىم» ورتالىعى 2019 جىلدان باستاپ جۇمىس ىستەۋدە. وسى ۋاقىت ارالىعىندا 579 ادامعا پانا بولىپ، الەۋمەتتىك كومەكتەر كورسەتىلگەن. ال جىل باسىنان بەرى 311 ادام قىزمەت العان.
كەزدەسۋ بارىسىندا قىزمەت الۋشىلار تاراپىنان ايتىلعان ءوتىنىش-ۇسىنىستار باسقارما باسشىلىعىمەن باقىلاۋعا الىندى.
