الماتىلىق ماقپال نۇرلان 29 قىركۇيەكتە تۋعان قىزى ۇل ەمەس ەكەنىن دالەلدەي الماي ءجۇر. قالاداعى №3 پەريناتالدىق ورتالىق دارىگەرلەرى قىزدىڭ مەديتسينالىق تۋ تۋرالى كۋالىگىنە ءسابيدىڭ جىنىسىن «ۇل» دەپ جازىپ بەرگەن. ەسىمىن اجار دەپ قويعان نارەستەسىنىڭ دۇنيە ەسىگىن اشقانىنا ءۇش ايعا جۋىقتاسا دا، ءالى ەشقانداي قۇجاتى جوق، – دەپ حابارلايدى «ادىرنا» ۇلتتىق پورتالى 31-ارناعا سىلتەمە جاساپ.
«ءوزى قىز بالا، بىراق قۇجاتتا «ۇل» دەپ كورسەتىلگەن. بىزگە وسىنى وزگەرتىپ بەرە الماي جاتىر. بالامنىڭ ءالى كۇنگە دەيىن تۋ تۋرالى كۋالىگى جوق. ەكى جارىم ايدان بەرى وسى قاتەگە بولا قۇجاتتى الا الماي ءجۇرمىز. ازان شاقىرىپ، اتىن «اجار» دەپ قويساق تا، بالامنىڭ تۋ تۋرالى كۋالىگى جوق. سونى وزگەرتىپ بەرە الماي جاتىر. ءبىر جارىم ايدا وزگەرتىپ بەرەمىز دەپ ايتقان ەدى»، – دەدى ءسابيدىڭ اناسى ماقپال نۇرلان.
ايەلدىڭ جولداسى ۇلاربەك ومار پەرزەنتحاناداعىلاردىڭ اداممەن قارىم-قاتىناسىنىڭ دا كوڭىلدى كونشىتپەيتىنىن ايتادى. ورتالىققا سان رەت كەلسە دە، قاناعاتتانارلىق جاۋاپ الماعان.
«ازاماتتىق پەن احاج قۇجاتىمىز بار. قازاقستان رەسپۋبليكاسىنىڭ تولىققاندى ازاماتىمىز. بىراق، 2,5 ايدان بەرى تۋ تۋرالى كۋالىك بەرمەي جاتىر. «قايدا بارساڭدار، وندا بارىڭدار» دەپ بىزگە دۇرىستاپ جاۋاپ بەرمەيدى»، – دەدى ماقپال نۇرلاننىڭ جولداسى ۇلاربەك ومار.
پەريناتالدى ورتالىق قىزمەتكەرلەرى بالانىڭ جىنىسىن جازعاندا قاتە جىبەرگەنىن مويىنداپ وتىر. بىراق بۇل دارىگەرلەردىڭ قاتەلىگى ەمەس ەكەنىن ايتادى.
«بۇل قاتەلىك دارىگەردىڭ سالعىرتتىعى دا، قاتەلىگى دە ەمەس. الايدا اقپاراتتىق جۇيەگە وپەراتور ءسابي تۋرالى اقپاراتتى ەنگىزگەن كەزدە جىنىسىن قاتە جازعان. بۇل قاتەلىكتى ءبىز بىردەن بايقادىق. بارلىق اقپاراتتىق جۇيە ءبىر-بىرىمەن بايلانىستى بولعاندىقتان، ونى سول جەردە بىردەن جوندەي المادىق. كەيىن الگوريتمگە سايكەس، وزىمىزدەن جوعارى تۇرعان مەكەمەگە حات جازدىق»، – دەپ ءتۇسىندىردى الماتى قالالىق پەريناتالدىق ورتالىق ديرەكتورىنىڭ ورىنباسارى سالتانات ەربولاتوۆا.
قالالىق دەنساۋلىق ساقتاۋ باسقارماسىنا حات جولداعان پەريناتالدىق ورتالىقتاعىلار ولقىلىق جۋىق ارادا تۇزەتىلەدى دەپ سەندىردى. ال ءسابيدىڭ اتا-اناسى قۇجات قولعا تيسە، سوتقا جۇگىنبەيتىنىن ايتىپ وتىر.
«ادىرنا» ۇلتتىق پورتالى.
