Almatylyq Maqpal Nurlan 29 qyrkúıekte týǵan qyzy ul emes ekenin dáleldeı almaı júr. Qaladaǵy №3 perınataldyq ortalyq dárigerleri qyzdyń medıınalyq týý týraly kýáligine sábıdiń jynysyn «ul» dep jazyp bergen. Esimin Ajar dep qoıǵan nárestesiniń dúnıe esigin ashqanyna úsh aıǵa jýyqtasa da, áli eshqandaı qujaty joq, – dep habarlaıdy «Adyrna» ulttyq portaly 31-arnaǵa silteme jasap.
«Ózi qyz bala, biraq qujatta «ul» dep kórsetilgen. Bizge osyny ózgertip bere almaı jatyr. Balamnyń áli kúnge deıin týý týraly kýáligi joq. Eki jarym aıdan beri osy qatege bola qujatty ala almaı júrmiz. Azan shaqyryp, atyn «Ajar» dep qoısaq ta, balamnyń týý týraly kýáligi joq. Sony ózgertip bere almaı jatyr. Bir jarym aıda ózgertip beremiz dep aıtqan edi», – dedi sábıdiń anasy Maqpal Nurlan.
Áıeldiń joldasy Ularbek Omar perzenthanadaǵylardyń adammen qarym-qatynasynyń da kóńildi kónshitpeıtinin aıtady. Ortalyqqa san ret kelse de, qanaǵattanarlyq jaýap almaǵan.
«Azamattyq pen AHAJ qujatymyz bar. Qazaqstan Respýblıkasynyń tolyqqandy azamatymyz. Biraq, 2,5 aıdan beri týý týraly kýálik bermeı jatyr. «Qaıda barsańdar, onda baryńdar» dep bizge durystap jaýap bermeıdi», – dedi Maqpal Nurlannyń joldasy Ularbek Omar.
Perınataldy ortalyq qyzmetkerleri balanyń jynysyn jazǵanda qate jibergenin moıyndap otyr. Biraq bul dárigerlerdiń qateligi emes ekenin aıtady.
«Bul qatelik dárigerdiń salǵyrttyǵy da, qateligi de emes. Alaıda aqparattyq júıege operator sábı týraly aqparatty engizgen kezde jynysyn qate jazǵan. Bul qatelikti biz birden baıqadyq. Barlyq aqparattyq júıe bir-birimen baılanysty bolǵandyqtan, ony sol jerde birden jóndeı almadyq. Keıin algorıtmge sáıkes, ózimizden joǵary turǵan mekemege hat jazdyq», – dep túsindirdi Almaty qalalyq perınataldyq ortalyq dırektorynyń orynbasary Saltanat Erbolatova.
Qalalyq densaýlyq saqtaý basqarmasyna hat joldaǵan perınataldyq ortalyqtaǵylar olqylyq jýyq arada túzetiledi dep sendirdi. Al sábıdiń ata-anasy qujat qolǵa tıse, sotqa júginbeıtinin aıtyp otyr.
«Adyrna» ulttyq portaly.
