بۇگىن دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ قالا اكىمدىگىنىڭ @akimat_shymkent ينستاگرام پاراقشاسىنىڭ تىكەلەي ەفيرىندە كۆي-گە قارسى ۆاكتسينالاۋ جۇمىسىنىڭ بارىسىن باياندادى.
شىمكەنتتە 15 قاراشادان باستاپ جۇكتى ايەلدەر مەن بالالارعا كوروناۆيرۋسقا قارسى «Pfizer» پرەپاراتىمەن ۆاكتسيناتسيالاۋ باستالعان بولاتىن. ەكى كۇن ىشىندە قالادا 173 ادام وسى ۆاكتسينانى قابىلداعان.
ەكپە الدىنان دارىگەرلەر تۇرعىنداردى مەديتسينالىق تەكسەرۋدەن وتكىزىپ، قارسى كورسەتىلىمدەرى بولماعان جاعدايدا ەكپە ەگۋدە. مەكەمەلەردە پروفيلاكتيكالىق جۇمىستاردى جۇرگىزۋگە بارلىق جاعداي جاسالعان.
– قالاعا بۇگىنگە دەيىن «Pfizer» ۆاكتسيناسىنىڭ 46 800 دوزاسى جەتكىزىلدى. بۇل پرەپاراتتىڭ قۇرامىندا يممۋندىق قورعانىس جاسايتىن ۆيرۋس بولماعاندىقتان كوروناۆيرۋس ينفەكتسياسىن تۋىنداتپايدى. ۆاكتسيناتسيا 21-28 كۇن ارالىقپەن ەكى رەت جۇرگىزىلەدى،-دەدى قالانىڭ باس دارىگەرى.
«Pfizer» ەكپەسى 12-دەن 18 جاسقا دەيىنگى جاسوسپىرىمدەرگە، جۇكتى ايەلدەر مەن لاكتاتسيا كەزەڭىندەگى ايەلدەرگە ەرىكتى تۇردە سالىنادى. پروفيلاكتيكالىق ۆاكتسينا ازاماتتاردىڭ ءوز كەلىسىمىمەن عانا جۇرگىزىلەدى. ال جاسوسپىرىمدەردى ۆاكتسيناتسيالاۋ اتا-اناسىنىڭ نەمەسە زاڭدى وكىلىنىڭ كەلىسىمىمەن جۇزەگە اسادى.
ەفير بارىسىندا ب.پوزيلوۆ تۇرعىندار جولداعان 50-دەن اسا سۇراققا جاۋاپ بەردى. سۇراقتاردىڭ باسىم بولىگى جاسوسپىرىمدەر مەن جۇكتى ايەلدەرگە سالىناتىن ۆاكتسينانىڭ اسەرى جونىندە بولدى.
ۆاكتسينا العانداردىڭ ىشىندە 133-ءى ءجاسوسپىرىم، 28-ءى جۇكتى ايەل جانە 12-ءسى بالا ەمىزەتىن انا. باسقارما باسشىسىنىڭ سوزىنشە، ەكپە العاندار اراسىندا كەرى رەاكتسيا جاعدايى تىركەلمەگەن.
شىمكەنت قالاسى اكىمدىگىنىڭ ءباسپاسوز قىزمەتى
