دۋبايدا ءوتىپ جاتقان «شىمكەنت قالاسىنىڭ كۇندەرى» اياسىندا، تۋريستەردى تارتۋدا بىرلەسكەن شارالاردى جوسپارلاۋ جانە ىشكى، سىرتقى، مەديتسينالىق ءتۋريزمدى دامىتۋ ماقساتىندا شىمكەنت قالاسىنىڭ اكىمدىگى مەن «Nirvana Travel and Tourism LLC»، «New magic LifeStyle»، «Unique Group Hotel’s and travel» جانە «Seaside Investment Dubai» كومپانيالارىمەن ەكىجاقتى مەموراندۋم ءتۇزىلدى.
مەموراندۋم اياسىندا بىرلەسكەن روۋد-شوۋلار ۇيىمداستىرۋ، يميدجدىك ونىمدەرىمەن الماسۋ، كورمەلەرگە، فورۋمدارعا، كونفەرەنتسيالارعا بىرلەسىپ قاتىسۋ، بىرگە ايقىندايتىن ىنتىماقتاستىقتىڭ باسقا دا باعىتتارىن قولداۋ جانە ۇيىمداستىرۋ سىندى كەلىسىمدەرگە كەلدى.
شىمكەنت قالاسىنىڭ كۇندەرى 22-25 قاراشا كۇندەرى ارالىعىندا وتەدى. ال، جالپى «EXPO Dubai 2020» حالىقارالىق كورمەسى ءساۋىر ايىنا دەيىن جالعاسادى. مۇندا 200-گە جۋىق ەلدىڭ پاۆيلونى قويىلعان. سونىڭ ىشىندە، قازاقستان پاۆيلونىنا كۇنىنە 3 مىڭعا جۋىق ادام كەلىپ تاماشالاۋدا.
ءىس-شاراعا شىمكەنت قالاسىنان قالا اكىمىنىڭ ءبىرىنشى ورىنباسارى شىڭعىس مۇقان، قالا اكىمىنىڭ ورىنباسارى ايبەك ساتتىباەۆ، قازاقستاننىڭ ءباا-داعى ەلشىسى ماديار مەڭىلبەكوۆ جانە شىمكەنت قالاسى ءماسليحاتىنىڭ حاتشىسى ب. نارىمبەتوۆ پەن بىرقاتار دەپۋتاتتار، بيزنەس قوعامداستىقتارىنىڭ ءبىر توپ دەلەگاتسياسى باردى.
شىمكەنت قالاسى اكىمدىگىنىڭ ءباسپاسوز قىزمەتى
