جاستار اللەياسى بۋككروسسينگ ورتالىعىنا اينالماق

309

ەل تاۋەلسىزدىگىنىڭ 30 جىلدىعىنا وراي شىمكەنتتەگى 8 شاعىناۋدانداعى جاستار اللەياسىندا «كىتاپ وقيتىن شىمقالا» كىتاپ الماسۋ شاراسى ءوتتى. شىمكەنت قالاسىنىڭ ورتالىقتاندىرىلعان كوپشىلىك كىتاپحانالار جۇيەسى اباي اتىنداعى ورتالىق كىتاپحاناسىنىڭ باستاماسىمەن مۇنداي كوشەدەگى كىتاپ سورەلەرى قالانىڭ بىرنەشە بۇرىشىنان اشىلدى. ەڭ اۋەلى، اۋرۋحانالار مەن وڭالتۋ ورتالىقتارىندا، قاراتاۋ اۋدانىنىڭ اۋماعىندا س.بايتەرەكوۆ ەسكەرتكىشى مەن №130 جالپى ورتا مەكتەپ ماڭىندا اشىلسا، ءبىر اپتا بۇرىن كىتاپ سورەسى چەرنوبىل اپاتى قۇرباندارىنا ارنالعان گۇلزارعا ورناتىلعان بولاتىن.

بۋككروسسينگ بۇرىشىنىڭ اشىلۋ سالتاناتىنا فانتاست-جازۋشى س.يساق، ادەت-عۇرىپ جانە سالت-ءداستۇر ورتالىعىنىڭ ءبولىم مەڭگەرۋشىسى م.وماروۆ، ارداگەر-ۇستاز گ.شەرىمبەتوۆا، «رۋحاني جاڭعىرۋ» ورتالىعىنىڭ مەڭگەرۋشىسى ز.ورالباەۆا جانە №23 مەكتەپ-ليتسەيدىڭ مۇعالىمدەرى مەن وقۋشىلارى قاتىستى. باستاما قالا تۇرعىندارىنا كىتاپ وقۋ مادەنيەتىن ناسيحاتتاپ، كوركەم ادەبيەتتەردى قولجەتىمدى ەتۋ جانە وسكەلەڭ ۇرپاقتى وتانسۇيگىشتىككە تاربيەلەۋ ماقساتىندا قولعا الىنعان.

جيىن بارىسىندا شاعىناۋداننىڭ تۇرعىنى ماريا پيۆۋاروۆا ءوزى وقىعان كىتاپتارىن سىيعا تارتتى.
— ءبىزدىڭ شاعىناۋداندا بۋككروسسينگ بۇرىشى اشىلعانىنا وتە قۋانىشتىمىن. قالا تۇرعىنى رەتىندە ءوز ۇلەسىمدى قوسقىم كەلدى. جەكە كىتاپ قورىمنان پاۋلو كوەلونىڭ «الحيميك»، رەينبوۋ راۋەللدىڭ «ۆەرنوست» روماندارىن سىيعا تارتتىم. كىتاپ سورەسىنىڭ مەكتەپتىڭ جانىنان اشىلعانى دا وتە وڭتايلى شەشىم دەپ بىلەمىن،- دەيدى ول.

شىمكەنت قالاسىنىڭ ورتالىقتاندىرىلعان كوپشىلىك كىتاپحانالار جۇيەسىنىڭ ديرەكتورى نۇريلا جۇمانوۆانىڭ ايتۋىنشا، كەز-كەلگەن قالا تۇرعىنى سورەدەگى قىزىقتارعان كىتاپتى وقۋعا الىپ، قايتا ورنىنا اكەلسە بولدى. سونداي-اق، ۇيىندەگى وقىلعان ادەبيەتتەرىن بۋككروسسينگ بۇرىشىنا سىيعا دا قالدىرا الادى. مۇنداي بۋككروسسينگ بۇرىشتارىن ورنالاستىرۋ كەلەر جىلى دا جالعاسىن تاپپاق.

كىتاپ الماسۋ بۇرىشىنىڭ اشىلۋ سالتاناتىندا «تۇركىستان سارايىنىڭ» انشىلەرى كەلۋشىلەردى ونەرلەرىمەن تامساندىردى.

زاميرا الدابەرگەنوۆا

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket