ارحانگەلسك قالاسىنىڭ بۇرىنعى اكىمى الەكساندر دونسكوي قالاعا پۋتينگراد دەگەن اتاۋ بەرۋدى ۇسىندى. ول "گازەتا.Ru" باسىلىمىنا بەرگەن سۇحباتىندا ۆلاديمير ءپۋتيننىڭ ءومىربايانى مەن قالا اراسىندا ەشقانداي بايلانىس جوق ەكەنىن، قالا اتاۋىن پۋتينگراد دەپ وزگەرتۋ ايماققا ينۆەستيتسيا مەن تۋريست تارتۋ ءۇشىن عانا قاجەت ەكەنىن ايتتى، - دەپ حابارلايدى Tengrinews.kz ءتىلشىسى.
"ماسەلە مىنادا، بايلانىس (پۋتينمەن) جوق. پرەزيدەنت بىزدە تۋماعان، وقىماعان، ءومىر سۇرمەگەن، بۇل - قالا ءۇشىن ۇلكەن كەمشىلىك. مەنىڭ يدەيام مىناداي: كەمەنى قالاي اتايسىڭ، ول سولاي جۇزەدى. وكىنىشكە قاراي، ارحانگەلسك ۇنەمى كۇيرەپ تۇرعان قالا. كەيىنگى جاڭالىق، قالا اكىمىنە ناشار جول ءۇشىن 2 ميلليون رۋبل ايىپپۇل سالىندى. قالا ەسكى، اپاتتىق جاعدايداعى تۇرعىن ۇيلەردىڭ سانى بويىنشا كوشباستاپ تۇر. مەنىڭ ويىمشا، قالا پۋتين اتالسا، بۇل قالاعا ينۆەستيتسيالار تارتۋعا، ارحانگەلسك قالاسىن دامىتۋ باعدارلاماسىن جۇزەگە اسىرۋعا جانە تۋريستەردى تارتۋعا مۇمكىندىك بەرەدى. مۇنداي اتاۋى بار قالادا شەنەۋنىكتەر، دەپۋتاتتار ناشار جۇمىس ىستەي المادى", - دەدى دونسكوي.
ەكس-شەنەۋنىك شەشەنستان استاناسىن مىسالعا كەلتىردى، وندا پۋتين داڭعىلىنا وتەتىن قادىروۆ داڭعىلى بار.
"گروزنىيدا قادىروۆ اتىنداعى كوشە بار جانە جاعدايى جاقسى. ول جەردە ەكى رەت بولدىم، بىزگە كوپ نارسە ۇيرەنۋ كەرەك", - دەدى دونسكوي.
بۇرىنعى اكىم ارحانگەلسك ەلتاڭباسىن اۋىستىرۋدى ۇسىنىپ، ونىڭ ەسكىرگەنىن ايتتى.
"ارحانگەلسك - الەمدەگى ەلتاڭباسىندا شايتان بەينەلەنگەن جالعىز قالا. قالا قوناقتارى ەلتاڭبانىڭ ماعىناسىن تۇسىنبەيدى، ول دۇرىس كومپوزيتسيا ەمەس. مەن كوڭىلدى، وتانسۇيگىشتىككە باۋليتىن بىرنارسە قوسۋ كەرەك دەپ سانايمىن، سوندىقتان ەڭ جاقسى نوبايعا بايقاۋ جاريالادىم. جەڭىمپاز قاراپايىم سىيلىق، ياعني 10 مىڭ رۋبل الادى", - دەدى دونسكوي.
ول ارحانگەلسك اتاۋىن وزگەرتۋ جانە قالانىڭ ەلتاڭباسىن وزگەرتۋ تۋرالى ۇسىنىسپەن جەرگىلىكتى بيلىككە جۇگىنۋدى جوسپارلامايتىنىن ايتتى.
"مەنىڭ ويىمشا، باستاما تومەننەن باستالۋى كەرەك. ەگەر ۇسىنىستارىمدى قالالىق دەپۋتاتتار كەڭەسى بايقاسا، دۇرىس بولادى", - دەپ تولىقتىردى دونسكوي.
جۋرناليستەر ارحانگەلسك اكىمشىلىگىنىڭ ءباسپاسوز قىزمەتىنەن يدەياعا تۇسىنىك بەرۋىن سۇراعاندا، ولار ءتىپتى ونى قاراستىرمايتىندارىن ايتقان.
ولار قالانىڭ "ماڭىزدى پروبلەمالارى" بار ەكەنىن ءتۇسىندىرىپ، ءتىپتى بۇل اقپاراتتى بايقاماعاندارىن ايتقان.
"دونسكوي - جەكە تۇلعا. بۇل ءتىپتى ءازىل تۇرىندە دە تالقىلانبادى", - دەدى ءباسپاسوز قىزمەتى.
“ادىرنا” ۇلتتىق پورتالى
