ولاردىڭ ايتۋىنشا، العان ديپلومدارىندا سايكەستەندىرۋ ءنومىرى جوق.
"بەس ايدان بەرى جۇمىسقا تۇرا الماي ءجۇرمىز. ءتورت جىل 210 مىڭ تەڭگەدەن تولەپ وقىعان ديپلومىمىز جارامسىز بولىپ شىقتى، ەندى قايدا بارامىز، نە ىستەيمىز؟", - دەپ جازدى ءبىر توپ جاس Instagram جەلىسىندەگى kritikakyzylordy-پاراقشاسىندا.
تۇلەكتەر ليتسەنزيا ماسەلەسى قاشان شەشىلەتىنىن ءبىلۋ ءۇشىن تەلەفون سوعىپ، ۋنيۆەرسيتەتكە بىرنەشە مارتە بارعانىن، ازىرگە جاۋاپ جوق ەكەنىن ايتادى.
"قانشا تۇلەككە بىرەگەي سايكەستەندىرۋ ءنومىرى جوق ديپلوم بەرىلدى. ال ءبىرىنشى كۋرس ستۋدەنتتەرى شە؟ ينستيتۋت وكىلدەرى سوتتا جەڭىپ شىققاندارىن ايتقان", - دەيدى قىزىلوردالىقتار.
قر ءبىلىم جانە عىلىم مينيسترلىگىنىڭ ءباسپاسوز حاتشىسى ءمولدىر ابدۋاليەۆا ۋنيۆەرسيتەت ارەكەتى زاڭسىز ەكەنىن ايتادى.
"2021 جىلدىڭ جازىندا ءبىز "اقمەشىت" گۋمانيتارلىق-تەحنيكالىق ينستيتۋتى باس ليتسەنزياسىنان ايىرىلعانى تۋرالى اقپارات جاريالادىق. ءتيىستى شەشىمدى سوت قابىلدادى. ۋنيۆەرسيتەتكە بارلىق سايكەسسىزدىكتى جويۋ ءۇشىن ۋاقىت بەرىلدى. الايدا جوعارى وقۋ ورنى ونى ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن قاجەتتى جۇمىس جۇرگىزۋدىڭ ورنىنا سوت تالقىلاۋىنا جانە قر بعم كوميتەتىنىڭ ءىس-ارەكەتتەرىنە شاعىمدانۋعا جۇمسادى", - دەدى قر ءبىلىم جانە عىلىم مينيسترلىگىنىڭ ءباسپاسوز حاتشىسى ءمولدىر ابدۋاليەۆا.
سونداي-اق، ۆەدومستۆو وكىلدەرى ليتسەنزيادان ايىرۋ تۋرالى جانە جوو-دا اككرەديتتەۋ بولماعان جاعدايدا ولار گرانتتاردى ساقتاي وتىرىپ جانە يگەرىلگەن كرەديتتەر مەن پاندەردى قايتا ەسەپكە الا وتىرىپ، باسقا جوو-عا اۋىسۋعا قۇقىلى ەكەنى تۋرالى جۇرتشىلىقتى حاباردار ەتكەنىن مالىمدەدى.
"اتا-انا مەن ستۋدەنتتەردىڭ جاريالانعان اقپاراتقا نازار اۋدارۋى جانە جوعارى وقۋ ورىندارىن تاڭداۋ مەن ودان ارى وقۋ ماسەلەسىنە جاۋاپكەرشىلىكپەن قاراۋى وتە ماڭىزدى. جوعارى وقۋ ورىندارىن جابۋ كەزىندە مينيسترلىك ءبىلىم بەرۋ قىزمەتتەرى ساپاسىنا قويىلاتىن تالاپتاردى باسشىلىققا الادى", - دەدى ۆەدومستۆونىڭ ءباسپاسوز حاتشىسى م. ابدۋاليەۆا.
ال رەكتور ەرلان شىنبەرگەنوۆ ينستيتۋتتان ليتسەنزيا الىپ، ديپلومداردىڭ جارامسىز ەكەنى تۋرالى اڭگىمەلەرگە سەنۋدىڭ قاجەتى جوق دەپ جاۋاپ بەردى.
"بىزدە كوپ بىلىكتى مۇعالىمدەر مەن پروفەسسورلار جۇمىس ىستەيدى. ەگەر بىزدە ليتسەنزيا بولماسا، ولار قالاي جۇمىس ىستەپ ءجۇر؟ رەسمي تۇردە، زاڭ بويىنشا جۇمىس ىستەيمىز! ديپلومدارعا كەلەتىن بولساق، وندا تەك سەريالىق ءنومىردى قويۋ كەرەك. ءبىز ديپلومداردى 2021 جىلدىڭ مامىرىندا بەردىك، ال ديپلومداردىڭ جەكە ۇلگىلەرىندە بىرەگەي سايكەستەندىرۋ نومىرلەرى بولۋى كەرەك دەگەن بۇيرىق 2021 جىلدىڭ 7 ماۋسىمىندا شىقتى. ءبىز قر باس پروكۋراتۋراسىنا قر بعم ءبىلىم جانە عىلىم سالاسىنداعى باقىلاۋدى قامتاماسىز ەتۋ كوميتەتىنىڭ ارەكەتىنە شاعىمدانۋ بويىنشا ءوتىنىش بەردىك. شەشىم شىققاننان كەيىن بارلىق 399 تۇلەككە بىردەن سەريالىق نومىرلەر قويامىز جانە ماسەلە شەشىلەدى", - دەدى ول.
"ادىرنا" ۇلتتىق پورتالى.
