2018 جىلعى 21 اقپاندا قازاقستان رەسپۋبليكاسى ۇلتتىق مۋزەيىندە دۇنيەجۇزىلىك ەكسكۋرسيا جۇرگىزۋشىلەردىڭ كۇنىنە وراي «جۇلدىزدى گيد» شوۋ-جوباسى ءوتتى.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ مىندەتىن اتقارۋشى لەونيد كوچەتوۆ «ۇلتتىق مۋزەي بۇگىنگى كۇنى ەلىمىزدىڭ تامىرى تەرەڭدە جاتقان تاريحى مەن مادەنيەتىن قالىڭ قاۋىمعا پاش ەتەتىن ءىرى مادەني وشاققا اينالدى. ەسىگىن اشقان كۇننەن-اق ۇلتتىق تاريح پەن ۇلتتىق قۇندىلىقتاردى ناسيحاتتاپ، كەلەشەك ۇرپاققا جەتكىزۋدە ماڭىزدى قىزمەت اتقارىپ كەلەدى. بۇگىنگى جوبا دا سونىڭ ايقىن دالەلى. ءۇشىنشى رەت ۇيىمداستىرىلىپ وتىرعان «جۇلدىزدى گيد» جوباسىنىڭ باستى ماقساتى – كوپشىلىكتىڭ نازارىن مىڭداعان جىلدىق تاريحىمىز بەن مادەنيەتىمىزگە اۋدارۋ. بۇل ءىس-شارانىڭ بۇگىن – دۇنيەجۇزىلىك ەكسكۋرسيا جۇرگىزۋشىلەر كۇنى مەرەكەسىن وراي وتكىزىلىپ وتىرعانى دا كەزدەيسوق ەمەس» – دەپ، جوبانىڭ ماڭىزدىلىعىنا توقتالىپ ءوتتى.
«جۇلدىزدى گيد» جوباسىنا قر ەڭبەك سىڭىرگەن قايراتكەرلەرى – ايگۇل يمانباەۆا، ايگۇل قوسانوۆا، ارداق بالاجانوۆا، جەڭىس ىسقاقوۆا، ءانشى دوس، تەاتر جانە كينو ارتىستەرى – داۋرەن سەرعازين مەن نۇركەن وتەۋىلوۆ قاتىستى.
№1 التىن زالىن – ايگۇل يمانباەۆا، №2 التىن زالىن – ايگۇل قوسانوۆا، ەجەلگى جانە ورتا عاسىرلار تاريحي زالىن – ارداق بالاجانوۆا، استانا زالىن – جەڭىس ىسقاقوۆا، ەتنوگرافيا زالىن – نۇركەن وتەۋىلوۆتى جانە تاۋەلسىز قازاقستان زالىن – ءانشى دوس كەلۋشىلەرگە تانىستىرىپ، قىزىقتى ەكسكۋرسيا جۇرگىزدى.
جوبا بارىسىندا قاتىسۋشىلار مۋزەيگە كەلۋشىلەردى ەلىمىزدىڭ تاريحى، مادەنيەتى جانە داستۇرىمەن تانىستىردى، ال كەلۋشىلەر تانىمال ونەر قايراتكەرلەرىن جاڭا قىرىنان كورۋگە مۇمكىندىك الدى.
«جۇلدىزدى گيد» جوباسى جىل سايىن 21 اقپاندا اتالىپ وتىلەتىن دۇنيەجۇزىلىك ەكسكۋرسيا جۇرگىزۋشىلەر كۇنىنە ورايلاستىرىلعان. ەكسكۋرسيا جۇرگىزۋشىلەردىڭ كاسىپتىك مەرەكەسى الەمنىڭ تۇكپىر-تۇكپىرىندە اتالىپ وتىلەدى، اسىرەسە ءىرى قالالار – تۋريستىك ورتالىقتاردا اتالعان مەرەكە وتە تانىمال. وزدەرىنىڭ كاسىپتىك مەرەكەسىن العاش رەت 1990 جىلى لوندون قالاسىنىڭ ەكسكۋرسيا جۇرگىزۋشىلەرى اتاپ وتكەن بولاتىن. بۇل كۇندى اتاپ ءوتۋ باستاماسىن ەكسكۋرسيا جۇرگىزۋشىلەر اسسوتسياتسيالارىنىڭ حالىقارالىق فەدەراتسياسى ۇسىنعان.
«جۇلدىزدى گيد» شوۋ-جوباسى ۇلتتىق مۋزەيدە بيىل ءۇشىنشى رەت وتكىزىلدى. وسىعان دەيىن جوباعا التىناي جوراباەۆا، قاراقات ءابىلدينا، مارجان اراپباەۆا، قالقامان سارين، ءادىل احمەتوۆ قاتارلى ونەر مايتالماندارى قاتىسقان بولاتىن.
nationalmuseum.kz
