سارارقانىڭ كىندىگى جاڭاارقا ءوڭىرى ونەردىڭ تۋىن تىككەن كيەلى وردا. تىم ارىگە بارماي-اق ءان-كۇي ونەرىنىڭ شارىقتاعان، سامعاعان، وركەندەگەن كەزەڭىڭ ەسكە الساق، كوز الدىمىزعا سايدالى سارى توقا بابامىزدىڭ ءداۋىرى كەلەدى. سايدالى - تۇڭعاتار رۋلارى «قويىلارى قورالاس، قوزىلارى ارالاسا» قاتار جۇرگەن اقتاۋ، ورتاۋ، قىزىلتاۋلاردان باستاۋ العان كوش كەرۋەنى يماناق، ەسكەنەگە ايالداپ «جايىلماعا» قوڭسى قونىپ جايلاپ جاتقان شۋاقتى كۇندەر جىلىمىعى ءالى دە ۇزىلمەي ونەر الەمىندە توقادان تاراعان «سۇڭقار ساكەن»، «مايدا قاسىم»، ودان وربىگەن پازىل تۇتقابەكوۆتەر بولىپ بىزگە جەتتى. ونەردە ۇزىلمەي كەلە جاتقان وسى ءبىر ساباقتاستىقتى بۇگىنگى كۇنگە جەتكىزىپ وتىرعان عالىم مۇحامەدين «ەسكەنە» اۋىلىندا تۋعان، جاستاردىڭ رەسپۋبليكالىق «جىگەر» فەستيۆالىنىڭ لاۋرەاتى، رەسپۋبليكالىق امىرە قاشاۋباەۆ اتىنداعى بايقاۋدىڭ جۇلدەگەرى، قر ەڭبەك سىڭىرگەن ءارتىسى.
الماتىداعى رەسپۋبليكالىق ەسترادا ونەرى ستۋدياسىن قازاق ءانىنىڭ «سۇرجەكەيى» اتانعان جۇسىپبەك ەلەبەكوۆتىڭ سىنىبىندا دۇلدۇل ءانشى قايرات بايبوسىنوۆپەن ۇزەنگىلەس بىتىرگەن، حالىق كومپوزيتورلارى ءبىرجاننىڭ، جاياۋ مۇسانىڭ، اقان سەرىنىڭ، ۇكىلى ىبىرايدىڭ ت.ب. اندەرىن نايحاتتاۋشى. عالىمنىڭ اسىرەسە، تايجان قالماعانبەتۇلىنىڭ شىعارمالارىن زەرتتەپ ىزدەپ تاۋىپ، جارىققا شىعارىپ (2013 ج.تايجاننىڭ «التىن كەسە» اندەر جيناعىن شىعارعان), ومىرگە قايتا اكەلۋىنىڭ ءوزى ءانشىنىڭ تەك قانا ورىنداۋشى ەمەس ونەر جوقتاۋشىسى ەكەندىگىن دە بايقاتادى. ءاۋ باستا عالىمعا جول نۇسقاپ باس ۇستاز بولعان تۋعان اعاسى قاراقويشى (سەمبى) مۇحامەديننىڭ داۋىسىنىڭ ءبىر ەرەكشەلىگى سىرباز ءانشى مادەنيەت ەشەكەەۆتى كوز الدىڭىزعا اكەلسە ال، عالىم تۋرالى ومىردەگى دە ءھام ونەردەگى دوسى قايرات بايبوسىنوۆ «عالىمنىڭ انشىلىگى بويىنا تۋعان جەردىڭ تابيعاتى مەن ءنارى سىڭگەن، كەشەگى يگىلىك اعامىزدىڭ سالعان ىزىمەن ەشكىمگە ەلىكتەپ سولىقتامايتىن وزگەگە ۇقسامايتىن وزىندىك ورنەگى بار، قۋاتتى باريتون داۋىس» دەپ باعا بەرگەن ەكەن.جاقىندا عالىم مۇحامەديننىڭ انتاباعى جارىققا شىققالى جاتىر. مىنا ارنايى شىعارىلىپ وتىرعان ان تاباعى تەك قانا عالىمنىڭ انشىلىك ونەرىنە عانا ەمەس وسى ديسكىدە قامتىلعان، ارماندا كەتكەن ارىستارىمىز بەن وسى جوبانى قولداپ، قولعا العان ازاماتتار ءۇشىن دە ماڭگىلىك ەستەلىك. ونەرىمىز وركەندەپ ورلەي بەرسىن.
داۋرەن ەسكەكباەۆ.
الماتى مەنەدجمەنت ۋنيۆەرسيتەتىنىڭ
باس عىلىمي قىزمەتكەرى،
تاريح عىلىمدارىنىڭ كانديداتى.
