شىمكەنت قالاسى مەن تۇركيا رەسپۋبليكاسىنىڭ ادانا قالالارى اراسىنداعى باۋىرلاستىق كەلىسىم ورناتۋ بويىنشا ءىس-شارا ءوتتى. Zoom پلاتفورماسى ارقىلى ونلاين قول قويۋ راسىمىنە شىمكەنت قالاسىنىڭ اكىمى مۇرات ايتەنوۆ پەن ادانا قالاسىنىڭ مەرى زەيدان كارالار مىرزا قاتىستى.
تاراپتار شىمكەنت پەن ادانا قالالارى اراسىنداعى ساۋدا-ەكونوميكالىق، ونەركاسىپتىك، تۋريزم، سپورت، مادەني جانە الەۋمەتتىك سالالارى اراسىندا ءوزارا ىقپالداستىق جانە ىنتىماقتاستىقتى ورناتۋ بويىنشا ەكى جاقتى كەلىسىمگە كەلدى. بىرقاتار سالا جەتەكشىلەرىمەن ىنتىماقتاستىقتى نىعايتۋ بويىنشا پەرسپەكتيۆالىق ماسەلەلەر تالقىلاندى.
بۇگىندە شىمكەنت قالاسىندا تۇرىك ينۆەستورلارىمەن بىرلەسە 55 ملن اقش دوللارىنا 6 جوبا (اياق كيىم ءوندىرىسى، اليۋمين پروفيلدەرى، كۇنباعىس تۇقىمىن قايتا وڭدەۋ جانە ت.ب) ىسكە اسىرىلعان.
قالا اكىمى م.ايتەنوۆ ەكى جاقتى كەلىسىم ىسكەرلىك بايلانىستار ورناتۋعا، بىرلەسە دامۋعا زور سەرپىن بەرەتىنىن اتاپ ءوتتى. ەكى قالا اراسىنداعى بارلىق قۇندىلىقتاردى ساقتاپ، ولاردى دامىتۋ جانە ءوزارا بايلانىستاردى نىعايتۋ تاراپتاردىڭ نەگىزگى ماقساتى بولماق.
– قالادا قولايلى بيزنەس احۋالىن دامىتۋ ءۇشىن بارلىق جاعداي جاسالعان. شىمكەنت پەن ادانا قالالارى اراسىندا باۋىرلاستىق قارىم-قاتىناستىڭ ورناۋى سىرتقى ەكونوميكالىق بايلانىستارعا، كاسىپكەرلىك قىزمەت سالاسىن كەڭەيتۋگە، قالالار اراسىنداعى تۋريستىك ىنتىماقتاستىقتى ورناتۋعا ۇلكەن سەرپىن بەرىپ، جالپى ەكونوميكالىق دەڭگەيدىڭ ارتۋىنا الىپ كەلەدى.
بۇل كەلىسىم ەكى ەل اراسىنداعى ارىپتەستىكتى ودان ءارى نىعايتۋعا نەگىز بولارى ءسوزسىز – دەدى قالا اكىمى.
سونداي-اق، جيىندا تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي، قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ابزال ساپاربەكۇلى ءسوز سويلەپ، ءىس-شارانىڭ ماڭىزدىلىعىنا توقتالىپ ءوتتى.
شىمكەنت قالاسى اكىمىنىڭ ورىنباسارى ماقسۇت يساحوۆتىڭ مودەراتورلىعىمەن وتكەن جيىنعا، شىمكەنت قالاسى ءماسليحاتىنىڭ حاتشىسى باحادىر نارىمبەتوۆ، قالالىق ءماسليحات دەپۋتاتتارى، تۇركيا رەسپۋبليكاسىنىڭ شىمكەنت قالاسى مەن تۇركىستان وبلىسىنداعى قۇرمەتتى باس كونسۋلى لاتيفشا اسانوۆ پەن «Ball – Textile» كومپانياسىنىڭ ءوندىرىس باسشىسى وگۋز دۋررۋ قاتىستى.
بۇگىنگە دەيىن شىمكەنت قالاسى شەتەلدىك توعىز قالامەن باۋىرلاستىق ورناتقان بولسا، ونىڭ ىشىندە تۇركيانىڭ يزمير جانە ەسكيشەحير قالالارى دا بار. ادانا قالاسى تۇركيانىڭ ەڭ ءىرى، ءتورتىنشى قالاسى. ونەركاسىبى دامىعان (ماقتا، تسيترۋس جەمىستەرى، سۇلى جانە كۇنجىت) ءىرى اۋىلشارۋاشىلىق ورتالىعى.
كەزدەسۋ سوڭىندا شىمكەنت پەن ادانا قالالارى اراسىندا ەكى جاقتى ىنتىماقتاستىق ورناتۋ مەموراندۋمىنا قول قويىلدى.
شىمكەنت قالاسى اكىمدىگىنىڭ ءباسپاسوز قىزمەتى
