الماتىدا اياجان ەدىلوۆانى ايۋاندىقپەن ءولتىردى دەپ ايىپتالىپ وتىرعان 28 جاستاعى تۇركىستاندىق وزىنە تاعىلعان ايىپتارمەن ءىشىنارا كەلىسپەي وتىر، دەپ حابارلايدى «ادىرنا» ءتىلشىسى «استانا» ارناسىنا سىلتەمە جاساپ.
كەشە اتىشۋلى ىسكە قاتىستى ەكىنشى سوت وتىرىسى ءوتتى. پروتسەسستە ايىپتالۋشى ورىمدەي قىزدى ولتىرگەنىن مويىنداعان. بىراق زورلىق كورسەتكەنىن تەرىسكە شىعارىپ الەك.
وسى كوكتەمدە ءىس-ءتۇزسىز جوعالىپ، كەيىن بولشەكتەلگەن دەنەسى تابىلعان اياجاننىڭ وقيعاسى ەستىگەن ەلدىڭ جاعاسىن ۇستاتقان ەدى. جانتۇرشىگەرلىك قىلمىسقا قاتىستى بۇگىن ەكىنشى سوت وتىرىسى ءوتتى. زورلاۋ دەرەگى بولعاندىقتان پروتسەسس جابىق رەجيمدە، ونلاين فورماتتا بولدى. بەس كۋاگەردەن جاۋاپ الىندى. ولار مارقۇمنىڭ ەكى تۋىسى مەن تانىستارى.
جابىرلەنۋشى تاراپتىڭ زاڭدى وكىلىنىڭ ايتۋىنشا، ايىپتالۋشى كىناسىن تولىق مويىنداماعان.
«سوتتالۋشى تورەبەكوۆ ادام ولتىرگەنىن مويىنداپ، زورلاعانىن جوققا شىعارىپ وتىر. ەندى قىزدىڭ زورلانعانىن دالەلدەۋ ءۇشىن جۇمىس ىستەيمىز»، - دەيدى جابىرلەنۋشى تاراپتىڭ زاڭدى وكىلى قادىرجان عالىمجانۇلى.
جابىرلەنۋشىلەر قىلمىس جاساعان ادامدى ءومىر بويىنا باس بوستاندىعىنان ايىرۋ قاجەت دەگەن پىكىردە. ونىڭ ايىبىن دالەلدەۋ ءۇشىن بارلىق دايەكتى ۇسىنامىز دەيدى.
اتىشۋلى ءىس 30 تومنان تۇرادى. پروتسەستى سۋديا ەركىن مايشىنوۆ قاراۋدا.
ەستەرىڭىزگە سالساق، قاندى قىلمىس بيىل ناۋرىز ايىندا بولدى. جۇمىستان شىعىپ، ءىس-ءتۇزسىز جوعالعان اياجاننىڭ دەنەسى نۇركەنت ىقشاماۋدانىنداعى پاتەردەن تابىلعان ەدى.
ايىپتالۋشى 28 جاستاعى تۇركىستان وبلىسىنىڭ تۋماسى. بۇرىن-سوڭدى سوتتالماعان. ونىڭ مۇنداي قادامعا نە ءۇشىن بارعانى ازىرگە بەلگىسىز. كەلەسى سوت وتىرىسى 9 جەلتوقسانعا وتەدى.
«ادىرنا» ۇلتتىق پورتالى
