اۋعانستاننىڭ تەك ءتورت پروۆينتسياسىندا بيىلعى جىلدىڭ 15 تامىزىنان بەرى "تاليبان" جاساقتارى ەلدى باسىپ العاننان كەيىن 100-دەن استام بۇرىنعى پوليتسيا مەن بارلاۋ قىزمەتكەرى جوعالىپ كەتكەن جانە وزبىرلىقپەن ولتىرىلگەن. "تاليبان" راقىمشىلىق شارالارىنا قاراماستان بۇرىنعى اسكەري قىزمەتكەرلەردى ءولتىرىپ جاتىر. بۇل تۋرالى 30 قاراشادا حالىقارالىق Human Rights Watch (HRW) قۇقىق قورعاۋ ۇيىمى ءوزىنىڭ ەسەبىندە باياندادى دەپ حابارلايدى "ادىرنا" ۇلتتىق پورتالى.
ۇيىم 2,5 اي ىشىندە، ياعني 15 تامىز-31 قازان ارالىعىندا گازني، گيلمەند، كانداگار جانە كۋندۋز پروۆينتسيالارىندا جۇزدەن استام كىسى ولتىرىلگەنى تۋرالى دەرەكتەر جيناعان. ولار حوست، پاكتيا، پاكتيكا جانە ت.ب. پروۆينتسيالارداعى ەرىكتى ءولىم جازاسىنا كەسۋدىڭ كەڭ كورىنىسىن كورسەتەدى. HRW 67 كۋاگەردەن، قازا تاپقانداردىڭ تۋىستارى مەن دوستارىنان، بۇرىنعى ۇكىمەت قىزمەتكەرلەرىنەن، جۋرناليستەردەن، مەديتسينا قىزمەتكەرلەرىنەن جانە تالىبتەردىڭ سودىرلارىنان سۇحبات الدى.
"تاليبان" باسشىلىعىنىڭ ۋادە ەتىلگەن امنيستياسى جەرگىلىكتى قولباسشىلاردىڭ اۋعانستاننىڭ بۇرىنعى قاۋىپسىزدىك كۇشتەرىن سوتسىز ولتىرۋىنە نەمەسە ۇرلاۋىنا كەدەرگى كەلتىرمەدى. "تاليبان" بۇدان ءارى ادام ءولتىرۋدىڭ الدىن الىپ، كىنالىلەردى جاۋاپقا تارتۋى جانە قۇربان بولعانداردىڭ وتباسىلارىنا وتەماقى تولەۋى كەرەك", - دەدى HRW باسشىسىنىڭ ازيا بويىنشا ورىنباسارى پاتريتسيا گوسسمان.
ەسەپتە "تاليباننىڭ" بۇرىنعى پوليتسيا مەن قاۋىپسىزدىك قىزمەتكەرلەرىنە ولاردىڭ قاۋىپسىزدىگىنە كەپىلدىك بەرەتىن قۇجاتتى تاپسىرۋ ءۇشىن تىركەۋگە تۇرۋدى بۇيىرعانى، بىراق سودىرلار بۇل اقپاراتتى ادامداردى تۇتقىنداۋ جانە سوتسىز ءولىم جازاسىنا كەسۋ ءۇشىن پايدالانعانى اتاپ ءوتىلدى. ولاردىڭ كوپشىلىگى تىركەلگەننەن كەيىن بىرنەشە كۇن ىشىندە ولتىرىلگەن. ءتىپتى، راديكالدار ولتىرىلگەن ادامداردىڭ تۋىستارى ولاردى تاۋىپ الۋى ءۇشىن دەنەلەردى تاستاپ كەتكەن.
"تاليبان" سونىمەن قاتار يگيل-حوراسان (ISKP, اۋعانستانداعى يسلام مەملەكەتى بولىمشەسى) سالافيزم كوزقاراسىن ۇستانۋشىلاردى نەمەسە بەلگىلى ءبىر تايپالاردىڭ وكىلدەرىن قولدادى دەپ ايىپتالعان ادامداردى دا سوتسىز ولتىرەدى.
بيلىك ەتكەن 3,5 اي ىشىندە "تاليبان" بۇرىنعى ۋادەلەرىنىڭ ەشقايسىسىن، سونىڭ ىشىندە اۋعانستاننان قۇلاتىلعان ۇكىمەتىنىڭ بۇرىنعى شەنەۋنىكتەرى مەن قاۋىپسىزدىك قىزمەتكەرلەرىن كەشىرۋ، ايەلدەر مەن قىزداردىڭ، پۋشتۋندىق ەمەس ەتنيكالىق توپتاردىڭ قۇقىقتارىن ساقتاۋ تۋرالى ەشبىر ۋادەسىن ورىندامادى.
الەۋمەتتىك جەلىلەردە كۇن سايىن تالىبتەردىڭ اۋعانستان ارمياسىنىڭ بۇرىنعى قىزمەتكەرلەرىن، پوليتسيا نەمەسە قاۋىپسىزدىك قىزمەتكەرلەرىن، سونداي-اق ازاماتتىق بەلسەندىلەردى، سونىڭ ىشىندە ايەلدەردى ءولتىرىپ نەمەسە ۇرلاعانى جايلى دەرەكتەر تارالىپ جاتىر.
"ادىرنا" ۇلتتىق پورتالى.
