شىمكەنتتە تىنىباەۆ كوشەسىندەگى جالدامالى پاتەرلەردىڭ بىرىندە 22 جاستاعى قىزدىڭ ءمايىتى تابىلدى، دەپ حابارلايدى جەرگىلىكتى "وتىرار" سايتى.
جانتۇرشىگەرلىك وقيعانىڭ انىق-قانىعىن قۇقىق قورعاۋ ورگاندارى ازىرگە حابارلاماعان.
پوليتسيا كورشىلەرى مەن كۋاگەرلەردەن جاۋاپ الادى. كينولوگتار مەن كريميناليستەر وقيعا ورنىندا جۇمىس ىستەيدى.
قورقىپ قالعان ءۇي تۇرعىندارى ۋچاسكەلىك پوليتسيا قىزمەتكەرلەرىنە كۇندەلىكتى پاتەرلەردە «پريتون» بار دەپ بىرنەشە رەت ايتقانىن ايتادى. بىراق تۇرعىنداردىڭ زارىن ەشكىم ەستىمەگەن.
29 قاراشادان 30 قاراشاعا قاراعان ءتۇنى قايعىلى وقيعا بولعان پاتەردە دە تاعى دا شۋلى وتىرىس بولعان. كورشىلەردىڭ ايتۋىنشا، ولار پوليتسياعا قوڭىراۋ شالىپ، بارلىعىن ايتقان. كۇلكى مەن ايقاي داۋىستارى مازا بەرمەگەنىنە شاعىمدانعان. ءبىر كۇنگە جالعا بەرىلەتىن پاتەر تۇرعىندارىنىڭ شۋىن توقتاتۋ ءۇشىن قابىرعانى بىرنەشە رەت سوققان ەكەن. شۋ باسىلماعان. ءبىر ساتتە جالدامالى پاتەردەگى داۋىستار سىپ تىيىلا قالعان.
جالدامالى پاتەردە قىزدىڭ ءمايىتى تابىلدى، قىلمىسكەرلەر ىزدەرىن جاسىرۋ ءۇشىن، ءمايىتتى ورتەۋگە تىرىسقان.
ءمايىت تابىلعان ءۇيدىڭ جانىندا بەينەباقىلاۋ كامەرالارىمەن جابدىقتالعان بىرنەشە مەكەمە بار. ول كۇدىكتىلەردىڭ جەكە باسىن انىقتاۋعا كومەكتەسۋى مۇمكىن.
"ادىرنا" ۇلتتىق پورتالى
