اقتاۋدا 18 جاستاعى قىز ەكى دوسىمەن وتىرىسى كەزىندە 4-شاعىن اۋداندا بەسىنشى قاباتتان سەكىرىپ كەتكەن. بۇل تۋرالى Lada پورتالى جازدى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، وقيعا 16 ءساۋىر كۇنى تۇندە ورىن العان. كۋاگەرلەردىڭ ايتۋىنشا، قۇلاعاننان كەيىن قىز ءبىراز ۋاقىت شوك كۇيىندە بولعان. تىپتى تۇرۋعا تىرىسىپ، جەدەل جاردەم كومەگىنەن باس تارتقان. دارىگەرلەر اۋىر جاراقات دياگنوزىن قويىپ، جابىرلەنۋشىنى ماڭعىستاۋ وبلىستىق اۋرۋحاناسىنا جەتكىزگەن.
"جاعدايى اۋىر دەپ باعالاندى. ناۋقاس مەحانيكالىق جەلدەتۋ ارقىلى تىنىس الىپ جاتىر. دياگنوز: ارالاس جاراقات، باس ميىنىڭ جابىق جاراقاتى، ميدىڭ شايقالۋى، كەۋدە قۋىسىنىڭ جابىق جاراقاتى، وڭ جاقتا قابىرعانىڭ جابىق سىنۋى، وڭ جاقتا گەموپنەۆموتوراكس، ءىشتىڭ جابىق جاراقاتى، باۋىردىڭ جىرتىلۋى، وڭ جاق مىقىن قاناتىنىڭ جابىق سىنۋى، وڭ جاق بىلەكتىڭ جابىق سىنۋى", - دەپ حابارلادى ماڭعىستاۋ وبلىستىق اۋرۋحاناسىنىڭ ءباسپاسوز قىزمەتى.
قايعىلى وقيعا كەزىندە جابىرلەنۋشى ەكى دوسىمەن بىرگە بولعان. كۋاگەرلەردىڭ ايتۋىنشا، ول بەسىنشى قاباتتان قۇلاعان.
پوليتسيا دەپارتامەنتى قازىر ءوز-وزىنە قول جۇمساۋعا دەيىن يتەرمەلەۋ فاكتىسى بويىنشا قىلمىستىق ءىس قوزعالعانىن حابارلادى.
