Áskerge sap-saý ketip, esinen aıyrylǵan kúıde oralǵan qyzylordalyq sarbaz anasyn tanydy, dep habarlaıdy "Adyrna" ulttyq portaly Turkystan.kz saıtyna silteme jasap.
19 jastaǵy Renat Jetkergenov áskerden oralǵannan keıin týystaryn tanı almaǵan bolatyn.
Renattyń anasy Aıǵanym Izbasarova uly emdelip jatqan Qyzylorda oblystyq psıhıkalyq densaýlyq ortalyǵyna kún qurǵatpaı barady. Ananyń qaıǵy-qasiretin kórip, dárigerler ulyn kórýge ruqsat beripti.
«Dárigerler Renattan: siz bul áıeldiń kim ekenin bilesiz be? – dep surady. Ol: «Iá, bul – Aıǵanym, anam, ol – muǵalim», – dep jaýap berdi. Biraq ulymmen sóılesýge ýaqytym bolmady, ol basy qatty aýyryp ketkenin aıtqan soń, dárigerler ony alyp ketti», – deıdi Aıǵanym Izbasarova.
Ol ulyn aldymen Nur-Sultan nemese Almatydaǵy bilikti mamandarǵa qaratýdy josparlap otyr. Odan soń kináliler jazasyn alsa deıdi. Qazirgi tergeý jumystaryna ananyń kóńili tolmaıdy.
Eske sala keteıik, Renat Jetkergenov Aqtaýdaǵy 25/744 teńiz flotynda áskerı boryshyn ótegen bolatyn. Merziminiń aıaqtalýyna 8 kún qalǵanda, «sál aýyryńqyrap» qaldy degen syltaýmen ony úıine qaıtyrypty. Renatty kútip alǵan ata-anasy uldaryn kórip jaǵalaryn ustaǵan: ústindegi kıimi – shuryq-tesik, aıaǵynda jazdyq tápishke bolǵan. Otan aldyndaǵy boryshyn ótep emes, quddy quldyqta júrgendeı oraldy, deıdi aǵasy. Kúdiktengen týystary jigitti aýrýhaǵa aparyp teksertken. Dárigerler basynan soqqy alǵanyn aıtqan.
Al Qorǵanys mınıstrliginiń ókili munyń barlyǵyn joqqa shyǵarǵan edi. Olar Renat ásker qataryna qabyldanǵanda densaýlyǵy jaqsy bolǵanyn, áskerde de oǵan eshkim tıispegenin aıtty.
Degenmen, kazarmada ne jaǵdaı bolǵany belgisiz. Renattyń da jaǵdaıdy túsindirýge shamasy joq. Al sarbazdyń et jaqyndary aıyptylardy taýyp, ádil jaza berýdi talap etpekshi.
"Adyrna" ulttyq portaly
