قازىر جەلىدە جەكە تاسىمالداۋمەن اينالىساتىن ادامداردى ءموبيلدى اۋدارىمداردان باس تارتىپ، قولما-قول اقشاعا كوشۋگە شاقىراتىن اقپارات تارالۋدا. وسىعان بايلانىستى قارجى مينيسترلىگى ءموبيلدى اۋدارىمداردى پايدالانۋعا قاتىستى سالىق زاڭناماسىنا وزگەرىستەر ەنگىزۋ تۋرالى حابارلادى، دەپ جازادى "ادىرنا" ۇلتتىق پورتالى stan.kz-كە سىلتەمە جاساپ.
- جەكە تۇلعالاردىڭ جەكە اۋدارىمدارىن كاسىپكەرلىك ماقساتتا تولەنەتىن تولەمدەردەن ءبولۋى تۋرالى بيزنەس قاۋىمداستىقپەن، بانكتەرمەن بىرنەشە رەت تالقىلاندى. بۇل باستامالاردىڭ ماقساتى تسيفرلىق كەڭىستىكتە بيزنەستى ودان ءارى دامىتۋ، جانە ولار قولما-قول اقشاعا كوشۋ ماقساتىن كوزدەمەيدى، - دەپ مالىمدەدى مينيسترلىكتىڭ ءباسپاسوز قىزمەتى.
مينيسترلىك مالىمەتتەردى مەملەكەتتىك كىرىس ورگاندارىنا بەرۋ تۋرالى الاڭداۋشىلىقتى نەگىزسىز دەپ اتادى.
- 2022 جىلدان باستاپ بانكتەردەن تەك كاسىپكەرلىك ەسەپشوتقا تۇسەتىن تولەمدەر تۋرالى اقپارات الۋ جوسپارلانۋدا. وسىلايشا، جەكە اۋدارىمدارعا سالىق سالىنبايدى. ماسەلەن، تاكسي جۇرگىزۋشىلەرى پاتەنت نەگىزىندە ارنايى سالىق رەجيمىن قولدانا الادى. بۇل رەجيم جىلىنا 10,3 ميلليون تەڭگەدەن اسپايتىن تابىس ءۇشىن قولايلى. كاسساعا كەلەتىن بولساق، قازىر بىرنەشە ءموبيلدى قوسىمشالار بار، كاسىپكەر كەز كەلگەن بانكتىڭ ءموبيلدى نۇسقاسىن جۇكتەي الادى. باقىلاۋ-كاسسالىق ماشينانى تولىعىمەن زاڭدى نەگىزدە قولدانىڭىز. ال سالىق ەسەپتىلىگى E-Salyq Business قوسىمشاسى ەنگىزىلگەننەن كەيىن اۆتوماتتى تۇردە قالىپتاسادى. ءبىز كاسىپكەرلەردى ارانداتۋشىلىققا بوي الدىرماۋعا جانە ۋاكىلەتتى ورگانداردىڭ رەسمي اقپاراتىن عانا پايدالانۋعا شاقىرامىز، - دەپ مالىمدەدى قارجى مينيسترلىگى.
مينيسترلىك جەكە كاسىپكەرلەرگە سالىق سالۋعا ىڭعايلى بولۋ ءۇشىن بىرنەشە سالىق رەجيمدەرى بار ەكەنىن، ولاردىڭ ىشىنەن ەڭ قولايلىسىن تاڭداۋعا بولاتىنىن ءتۇسىندىردى. بۇل شارالاردىڭ بارلىعى بيزنەستى جۇرگىزۋدى ودان ءارى جەڭىلدەتۋگە باعىتتالعانىن، سونداي-اق جەكە كاسىپكەرلەر 2023 جىلعا دەيىن تابىس سالىعىن تولەۋدەن بوساتىلاتىنىن مالىمدەدى.
"ادىرنا" ۇلتتىق پورتالى
