شىمكەنت اكىمىنىڭ ءبىرىنشى ورىنباسارى شىڭعىس مۇقان قالادا ءبىلىم سالاسىنداعى سىبايلاس جەمقورلىققا توسقاۋىل قويۋ جۇمىستارى جايىندا ايتىپ بەردى، دەپ حابارلايدى قازاقپارات ءتىلشىسى.
«ءبىلىم سالاسىنا توقتالايىن. سەبەبى ءبىلىم سالاسىندا سىبايلاس جەمقورلىقتىڭ بولۋى جالپى بولاشاعىمىزعا بالتا شابۋ دەپ ەسەپتەيمىن. ءبىلىم – ول كىرشىكسىز تازا، بولاشاعىمىزدى جاسايدى. سوندىقتان ءبىلىم سالاسىندا سىبايلاس جەمقورلىقتىڭ بولۋىنىڭ ءوزى قيسىنسىز . ونىمەن قالاي كۇرەسەمىز؟ قازىر شىمكەنت قالاسىندا 800-گە تارتا ءبىلىم بەرۋ ۇيىمى بار. ارقايسىسىنىڭ ءوزىنىڭ باسشىلىعى بار، ولارعا مەملەكەت قارجىسى بولىنەدى. بۇل تۇرعىدا سىبايلاس جەمقورلىق تاۋەكەلى كوپ. اسىرەسە، مۇعالىمدەردى، تەحنيكالىق ءارى اكىمشىلىك قىزمەتكەرلەرىن مەكتەپكە تاعايىنداعاندا كورىنىس بەرەدى ەكەن. وسى ماسەلە شىمكەنتتە قالاي شەشىلىپ جاتىر؟ شىمكەنت قالاسىنىڭ اكىمى بۇل ماسەلەگە ءجىتى كوڭىل ءبولىپ وتىر. قازىر ارنايى پورتالعا (www.hr-process.kz/1 ) تاپسىرىس بەرىلگەن. كەز كەلگەن ءبىلىم بەرۋ ۇيىمى، ياعني مەكتەپ ءبىر مۇعالىمدى الاتىن بولسا، ونىڭ ءتيىستى تالاپتارى ەسكەرىلگەن»، - دەدى ش. مۇقان فەيسبۋكتەگى Antikor.live الاڭىندا وتكەن بريفينگتە. وسى ورايدا ول بالل كورسەتكىشى جوعارى مۇعالىمدەر جۇمىسقا قابىلداناتىنىن ايتتى. «ديرەكتورعا «مەنى جۇمىسقا ال» دەپ اقشا ۇسىنسا دا، ونى جۇمىسقا الا المايدى. سەبەبى كەز كەلگەن بوس ورىن سول پورتالعا ورنالاستىرىلادى. پورتالعا قىزمەتكە تۇرام دەيتىن ۇمىتكەرلەر وتىنىشتەرىن ەنگىزەدى، ءتۇرلى كريتەريلەر بويىنشا بالل بەرىلگەن. پورتال، اقپاراتتىق تەحنولوگيا 75 پايىزعا دەيىن قاي مۇعالىمنىڭ قانداي الەۋەتى بار ەكەنىن انىقتاپ بەرەدى. تەك قانا 25 پايىزىن مەكتەپتە قۇرىلعان كوميسسيا شەشەدى. سوندىقتان كورسەتكىشتەرى جوعارى مۇعالىمدى مەكتەپ ديرەكتورى الۋعا مىندەتتى بولىپ قالادى. سونىمەن قاتار، مەكتەپتىڭ ديرەكتورلارىن تاعايىنداۋ قازاقستان رەسپۋبليكاسىنىڭ زاڭناماسىمەن رەتتەلگەن، جەتى دەڭگەيدەن تۇرادى»، - دەدى شىمكەنت قالاسى اكىمىنىڭ ءبىرىنشى ورىنباسارى. «دەگەنمەن قانشالىقتى مىقتى جۇيە جاسالعانىمەن، قانشالىقتى بارلىعىن اقپاراتتىق باعدارلامالارعا ەنگىزگەنىمەن، سول باسشى ءوزىنىڭ ار-ۇياتىنىڭ الدىندا ادال بولماسا، ءبارىبىر زاڭناما تالاپتارى بۇزىلۋى مۇمكىن. ءبىزدىڭ ماقساتىمىز – سىبايلاس جەمقورلىق تاۋەكەلدەرىن تسيفرلاندىرۋ ارقىلى عانا ەمەس، سونىمەن قاتار باسشىلارمەن تىكەلەي جۇمىس ىستەۋ اياسىندا الدىن الۋ. قازىر كەز كەلگەن ءبىلىم سالاسىنداعى باسشى دۇرىس ءتۇسىنۋى ءتيىس. ەگەر ادال ءارى ءادىل ءبىلىم ءۇشىن جۇمىس ىستەيتىن بولسا، ءبىز مىقتى قازاقستاننىڭ بولاشاعىن قالىپتاستىرا الماقپىز. بالالارىمىز دامىعان ەلدە تۇرسىن دەسەك، بىلىمگە ادال قىزمەت ەتۋىمىز كەرەك. سوندىقتان بۇل جەردە ادامنىڭ ار-ۇياتى، سانا ماسەلەسى دە ۇلكەن مانگە يە»، - دەدى شىڭعىس مۇقان. ايتا كەتەيىك، بۇگىن مەملەكەت باسشىسى قاسىم-جومارت توقاەۆ سىبايلاس جەمقورلىققا قارسى كۇرەس ماسەلەلەرى جونىندە كەڭەس وتكىزدى.
