Şyŋǧys Mūqan Şymkentte bılım salasynda sybailas jemqorlyqqa tosqauyl qoiu şaralaryn aitty

Şymkent äkımınıŋ bırınşı orynbasary Şyŋǧys Mūqan qalada bılım salasyndaǧy sybailas jemqorlyqqa tosqauyl qoiu jūmystary jaiynda aityp berdı, dep habarlaidy QazAqparat tılşısı. «Bılım salasyna toqtalaiyn. Sebebı bılım salasynda sybailas jemqorlyqtyŋ boluy jalpy bolaşaǧymyzǧa balta şabu dep esepteimın. Bılım – ol kırşıksız taza, bolaşaǧymyzdy jasaidy. Sondyqtan bılım salasynda sybailas jemqorlyqtyŋ boluynyŋ özı qisynsyz . Onymen qalai küresemız? Qazır Şymkent qalasynda 800-ge tarta bılım beru ūiymy bar. Ärqaisysynyŋ özınıŋ basşylyǧy bar, olarǧa memleket qarjysy bölınedı. Būl tūrǧyda sybailas jemqorlyq täuekelı köp. Äsırese, mūǧalımderdı, tehnikalyq ärı äkımşılık qyzmetkerlerın mektepke taǧaiyndaǧanda körınıs beredı eken. Osy mäsele Şymkentte qalai şeşılıp jatyr? Şymkent qalasynyŋ äkımı būl mäselege jıtı köŋıl bölıp otyr. Qazır arnaiy portalǧa (www.hr-process.kz/1 ) tapsyrys berılgen. Kez kelgen bılım beru ūiymy, iaǧni mektep bır mūǧalımdı alatyn bolsa, onyŋ tiıstı talaptary eskerılgen», - dedı Ş. Mūqan Feisbuktegı Antikor.live alaŋynda ötken brifingte. Osy oraida ol ball körsetkışı joǧary mūǧalımder jūmysqa qabyldanatynyn aitty. «Direktorǧa «menı jūmysqa al» dep aqşa ūsynsa da, ony jūmysqa ala almaidy. Sebebı kez kelgen bos oryn sol portalǧa ornalastyrylady. Portalǧa qyzmetke tūram deitın ümıtkerler ötınışterın engızedı, türlı kriteriiler boiynşa ball berılgen. Portal, aqparattyq tehnologiia 75 paiyzǧa deiın qai mūǧalımnıŋ qandai äleuetı bar ekenın anyqtap beredı. Tek qana 25 paiyzyn mektepte qūrylǧan komissiia şeşedı. Sondyqtan körsetkışterı joǧary mūǧalımdı mektep direktory aluǧa mındettı bolyp qalady. Sonymen qatar, mekteptıŋ direktorlaryn taǧaiyndau Qazaqstan Respublikasynyŋ zaŋnamasymen rettelgen, jetı deŋgeiden tūrady», - dedı Şymkent qalasy äkımınıŋ bırınşı orynbasary. «Degenmen qanşalyqty myqty jüie jasalǧanymen, qanşalyqty barlyǧyn aqparattyq baǧdarlamalarǧa engızgenımen, sol basşy özınıŋ ar-ūiatynyŋ aldynda adal bolmasa, bärıbır zaŋnama talaptary būzyluy mümkın. Bızdıŋ maqsatymyz – sybailas jemqorlyq täuekelderın sifrlandyru arqyly ǧana emes, sonymen qatar basşylarmen tıkelei jūmys ısteu aiasynda aldyn alu. Qazır kez kelgen bılım salasyndaǧy basşy dūrys tüsınuı tiıs. Eger adal ärı ädıl bılım üşın jūmys ısteitın bolsa, bız myqty Qazaqstannyŋ bolaşaǧyn qalyptastyra almaqpyz. Balalarymyz damyǧan elde tūrsyn desek, bılımge adal qyzmet etuımız kerek. Sondyqtan būl jerde adamnyŋ ar-ūiaty, sana mäselesı de ülken mänge ie», - dedı Şyŋǧys Mūqan. Aita keteiık, bügın Memleket basşysy Qasym-Jomart Toqaev sybailas jemqorlyqqa qarsy küres mäselelerı jönınde keŋes ötkızdı.