«روسسيا 1» ارناسىنىڭ ەفيرىندە ساۋلە وماروۆانى جەرگىلىكتى ساراپشىلار مەن ساياساتتانۋشىلار ماقتاپ، «امەريكانى باسىپ الۋعا باتىل قادام جاساعان ءبىزدىڭ كەڭەستىك قىزىمىز» دەپ اتادى. بۇل تۋرالى "ادىرنا" ۇلتتىق پورتالى حابارلايدى.
– سەناتور جولداس وماروۆادان جاۋاپ الدى. ساۋلە كومسومولدان كەتكەن جوق. جانىنىڭ تۇبىندە ول ءالى دە كسرو-دا كەڭەستىك ءداستۇر بويىنشا وسكەن كەڭەستىك ادام. ءبىلىمى ۇزدىك بولىپ، ماسكەۋ مەملەكەتتىك ۋنيۆەرسيتەتىندە وقىعان. ءبىز قازىردىڭ وزىندە اقش-تىڭ جۇرەگىنە ەنىپ الدىق! – دەپ مالىمدەدى «ناتسيونالنايا وبورونا» جۋرنالىنىڭ باس رەداكتورى يگور كوروتچەنكو.
كەيىنىرەك ول وماروۆانىڭ امەريكاندىق قارجى جۇيەسىنە تەرەڭ ەنۋى – رەسەيلىك ارنايى بارلاۋ قىزمەتىنىڭ ۇلكەن جەتىستىگى ەكەنىن ايتتى.
– ءبىزدىڭ بارلاۋ كەرەمەت جۇمىس ىستەيدى. ءبىز بىلمەيمىز، مۇمكىن ءبىزدىڭ كومسومولدى العا تارتىپ وتىرعان اقش پرەزيدەنتى «جولداس بايدەن؟» ەمەس پە، – دەدى رەسەي فەدەراتسياسىندا ءوزىن جەتەكشى اسكەري ساراپشىسى دەپ سانايتىن كوروتچەنكو.
جۇرگىزۋشى ولگا سكابەەۆا امەريكاندىق سەناتورلار ساۋلەدەن جاۋاپ الۋعا جەتكىلىكتى دايىن ەمەس ەكەنىن جانە وندا «قابىلەتسىز ادامدار» جۇمىس ىستەيتىنىن ايتتى.
ەسكە سالە كەتەيىك، 18 قاراشا كۇنى اقش سەناتىندا پرەزيدەنت دجو بايدەن ۇسىنعان امەريكالىق بانك رەتتەۋشىسىنىڭ جوعارى لاۋازىمىنا ۇمىتكەر، ەتنيكالىق قازاق ساۋلە وماروۆا ءسوز سويلەدى. وماروۆا وتكەن ءومىرىن اقتاپ، ءتىپتى كوممۋنيست ەمەستىگىن دە جاريالاۋعا ءماجبۇر بولدى. ساۋلە وماروۆا وتباسى مۇشەلەرىنىڭ ءبىرىن يوسيف ستالين باسقاراتىن كوممۋنيستىك پارتيا ولتىرگەنىن، ال اجەسى ەكى رەت ولىمنەن امان قالعانىن ايتىپ، تاريحتى ەستە ساقتايتىنىن جانە امەريكاندىق ەكەنىن ماقتان تۇتاتىنىن، مەملەكەتتىك قىزمەتكە دايىن ەكەنىن ايتتى.
"ادىرنا" ۇلتتىق پورتالى
