شىمكەنتتە ءبىلىم سالاسى قىزمەتكەرلەرىنىڭ جىل سايىنعى ءداستۇرلى تامىز كەڭەسى ءوتتى. شاھار باسشىسى قاتىسقان كەڭەستە قالا پەداگوگتارى اتقارىلعان ىستەردى تارازىلاپ، الداعى مىندەتتەرىن ايقىندادى. ال ۇزدىكتەرىن قالا اكىمى مەن ءبىلىم بەرۋ باسقارماسىنىڭ باسشىلىعى «قۇرمەت گراموتالارى» جانە «العىس حاتتارمەن» ماراپاتتادى.
ءداستۇرلى جيىندا شىمكەنت باسشىسى مۇرات ايتەنوۆ جاڭا وقۋ جىلىندا بالالاردىڭ دەنساۋلىعىن ساقتاۋ ءبىرىنشى كەزەكتەگى ماسەلە ەكەندىگىنە كوڭىل ءبولدى. سونداي-اق، ۇستازدار قاۋىمىنا جۇكتەلگەن مىندەت پەن قويىلعان تالاپ الدەقايدا كوپ ەكەنىن ايتتى.
ال، تەحنولوگيا دامىعان زاماندا ينتەرنەت بالا تاربيەسىنە تەرىس ىقپال ەتەتىنىن ەسكەرىپ، اتا-انالارى مەن ۇستازدارعا وقۋشىلاردىڭ الەۋمەتتىك جەلىدەگى بەلسەندىلىگىن باقىلاۋدا ۇستاۋدى ەسكەرتتى.
قالا اكىمىنىڭ سوزىنشە، زياتكەر ۇرپاق تاربيەلەۋ – باستى ستراتەگيالىق مىندەتىمىز. زياتكەرلىك باسەكە ورنىققان بۇگىنگىدەي كەزەڭدە بالالارىمىز وزدەرىن كۇندەلىكتى جەتىلدىرۋى ءتيىس دەگەن قالا باسشىسى ۇستازدارعا بالالارىمىزدى جان-جاقتى دامىتۋعا شاقىردى. سونداي-اق، پەداگوگتارعا جۇكتەلگەن مىندەت پەن قويىلعان تالاپ الدەقايدا كوپ ەكەنىن ءسوز ەتتى. سونىمەن قاتار، مۇرات ايتەنوۆ ءداستۇرلى تامىز كەڭەسى وتكەن №65 مەكتەپتى ارالاپ شىقتى.
بۇگىندە ءۇشىنشى مەگاپوليستە ءبىلىم وردالارىن قارجىلاندىرۋ ناتيجەسىندە ولاردىڭ سانىن ارتتىرۋ جىل سايىن ءوسىپ كەلەدى. ناقتىراق ايتساق، الداعى 5 جىلدا شىمكەنتتە 72 مەكتەپتىڭ قۇرىلىسىن جۇرگىزۋ جوسپارلانىپ، ءۇش اۋىسىمدى مەكتەپتەر ماسەلەسى مەن ءبىلىم ۇيالارى جوق شاعىناۋداندار مەن تۇرعىن الاپتاردا جاڭا مەكتەپتەر سالىنۋ جوسپارلانۋدا.
بيىلدىڭ وزىندە 32 مەكتەپتىڭ قۇرىلىسى باستالىپ، 20 مەكتەپ جىل سوڭىنا دەيىن پايدالانۋعا بەرىلەدى ەكەن. ال 16 مەكتەپتىڭ قۇرىلىسىنا جەكە ينۆەستورلار تارتىلعان.
پەداگوگتاردىڭ ءداستۇرلى تامىز كونفەرەنتسياسىندا ءسوز العان قالالىق ءبىلىم باسقارماسىنىڭ باسشىسى جانات تاجيەۆا وتكەن وقۋ جىلىندا اتقارىلعان ىستەرگە ەسەپ بەرىپ، بولاشاققا باعدار جاسادى. باس ۇستازدىڭ ايتۋىنشا، ەڭ باستىسى، ءبىلىم بەرۋ ساپاسىنا نازار اۋدارۋ قاجەت. جالپى، وتكەن وقۋ جىلىن قالا مەكتەپتەرى جاقسى ناتيجەمەن اياقتاپتى.
قالا اكىمى ءبىلىم ساپاسىنا ۇلكەن ءمان بەرىپ، كاسىبي باعىتتاۋ جۇمىستارىن كۇشەيتۋدى، اتا-انالارمەن ءتيىمدى ارەكەتتەستىكتى قامتاماسىز ەتۋدى تاپسىردى. جاڭارتىلعان ءبىلىم بەرۋ جۇيەسىنە كوشۋ ءۇشىن ۇستازداردى دايىنداۋ قاجەتتىلىگى دە ايتىلدى. جيىن بارىسىندا قالانىڭ ۇزدىك دەگەن ۇستازدارى قالا اكىمى مەن ءبىلىم باسقارماسى باسشىسىنىڭ قۇرمەت گراموتالارى جانە العىس حاتتارىمەن ماراپاتتالدى.
