Shymkentte bilim salasy qyzmetkerleriniń jyl saıynǵy dástúrli tamyz keńesi ótti. Shahar basshysy qatysqan keńeste qala pedagogtary atqarylǵan isterdi tarazylap, aldaǵy mindetterin aıqyndady. Al úzdikterin qala ákimi men bilim berý basqarmasynyń basshylyǵy «Qurmet gramotalary» jáne «Alǵys hattarmen» marapattady.
Dástúrli jıynda Shymkent basshysy Murat Áıtenov jańa oqý jylynda balalardyń densaýlyǵyn saqtaý birinshi kezektegi másele ekendigine kóńil bóldi. Sondaı-aq, ustazdar qaýymyna júktelgen mindet pen qoıylǵan talap áldeqaıda kóp ekenin aıtty.
Al, tehnologııa damyǵan zamanda ınternet bala tárbıesine teris yqpal etetinin eskerip, ata-analary men ustazdarǵa oqýshylardyń áleýmettik jelidegi belsendiligin baqylaýda ustaýdy eskertti.
Qala ákiminiń sózinshe, zııatker urpaq tárbıeleý – basty strategııalyq mindetimiz. Zııatkerlik báseke ornyqqan búgingideı kezeńde balalarymyz ózderin kúndelikti jetildirýi tıis degen qala basshysy ustazdarǵa balalarymyzdy jan-jaqty damytýǵa shaqyrdy. Sondaı-aq, pedagogtarǵa júktelgen mindet pen qoıylǵan talap áldeqaıda kóp ekenin sóz etti. Sonymen qatar, Murat Áıtenov dástúrli tamyz keńesi ótken №65 mektepti aralap shyqty.
Búginde úshinshi megapolıste bilim ordalaryn qarjylandyrý nátıjesinde olardyń sanyn arttyrý jyl saıyn ósip keledi. Naqtyraq aıtsaq, aldaǵy 5 jylda Shymkentte 72 mekteptiń qurylysyn júrgizý josparlanyp, úsh aýysymdy mektepter máselesi men bilim uıalary joq shaǵynaýdandar men turǵyn alaptarda jańa mektepter salyný josparlanýda.
Bıyldyń ózinde 32 mekteptiń qurylysy bastalyp, 20 mektep jyl sońyna deıin paıdalanýǵa beriledi eken. Al 16 mekteptiń qurylysyna jeke ınvestorlar tartylǵan.
Pedagogtardyń dástúrli tamyz konferenııasynda sóz alǵan qalalyq bilim basqarmasynyń basshysy Janat Tájıeva ótken oqý jylynda atqarylǵan isterge esep berip, bolashaqqa baǵdar jasady. Bas ustazdyń aıtýynsha, eń bastysy, bilim berý sapasyna nazar aýdarý qajet. Jalpy, ótken oqý jylyn qala mektepteri jaqsy nátıjemen aıaqtapty.
Qala ákimi bilim sapasyna úlken mán berip, kásibı baǵyttaý jumystaryn kúsheıtýdi, ata-analarmen tıimdi árekettestikti qamtamasyz etýdi tapsyrdy. Jańartylǵan bilim berý júıesine kóshý úshin ustazdardy daıyndaý qajettiligi de aıtyldy. Jıyn barysynda qalanyń úzdik degen ustazdary qala ákimi men bilim basqarmasy basshysynyń qurmet gramotalary jáne alǵys hattarymen marapattaldy.
