قازاقستاندىق ديقاندار قامباعا ءبىر ميلليون توننا بيداي جينادى. ەلدە 960 مىڭ گەكتاردان استام ەگىس القابى ورىلىپ ءبىتتى.
جيىن-تەرىم 6 وڭىردە ءجۇرىپ جاتىر. ونىڭ ىشىندە جامبىلدىق شارۋالار ناۋقاندى اياقتاۋعا جاقىن. مۇندا بيداي القابىنىڭ 96%-ءى يگەرىلدى. باتىس قازاقستان وبلىسىندا دا ەگىستىكتىڭ 71%-ءى جينالدى.
سونداي-اق تۇركىستان، قىزىلوردا، الماتى جانە شىعىس قازاقستان وبلىستارىندا دا بيدايعا وراق تۇسكەن. اۋىلشارۋشىلىق مينيسترلىگى بيىل بيداي بىلتىرعىدان 20%-كە از بولادى دەگەن بولجام جاسادى.
ەگىن جيناۋ ناۋقانى قازاقستان عانا ەمەس، الەمنىڭ بىرنەشە ەلدەرىندە ءجۇرىپ جاتىر. دەسە دە، بيرجادا بيداي باعاسى تۇسەر ەمەس. فيۋچەرستەرى جوعارى قاراي باعىت العان. ساراپشىلاردىڭ ايتۋىنشا، ءدال قازىر ۇسىنىس كوپ، سۇرانىس ازداۋ بولىپ تۇر. سونىڭ وزىندە باعا تومەندەر ەمەس.
