بەلگىلى جازۋشى، دراماتۋرگ، قازاقستاننىڭ ەڭبەك سىڭىرگەن قايراتكەرى راحىمجان وتارباەۆ ومىردەن وزدى. قارالى حابار تۋرالى فەيسبۋكتەگى پاراقشاسىندا اقىن باۋىرجان قاراعىزۇلى جازدى.
"قايران اعام-اي! وتكىنشى دۇنيە-اي! راحىمجان وتارباەۆ دۇنيەدەن ءوتىپتى! سەنە الماي وتىرمىن! توبەمنەن جاي تۇسكەندەي بولىپ وتىرمىن! يمانى سالامات بولسىن، قايتەيىن…", — دەپ جازدى اقىن.
راحىمجان وتارباەۆ 1956 جىلى 19 قازاندا اتىراۋ وبلىسى قۇرمانعازى اۋدانىندا دۇنيەگە كەلگەن. 1977 جىلى ورال پەداگوگيكا ينستيتۋتىن بىتىرگەن.
ءار جىلداردا "ورال ءوڭىرى" گازەتىندە ءتىلشى، قازاق ءتىلى مەن ادەبيەتى ءپانىنىڭ مۇعالىمى، قازاق تەلەراديو كوميتەتىنە رەداكتور، "قازاق ادەبيەتى" گازەتىندە، "جالىن" الماناحىندا ءبولىم مەڭگەرۋشىسى، قىرعىزستاندا قازاقستان ەلشىلىگىنىڭ اتتاشەسى، ماڭعىستاۋ وبلىستىق راديو-تەلەۆيدەنيە كومپانياسىنىڭ توراعاسى، اتىراۋ وبلىستىق دراما تەاترىنىڭ ديرەكتورى، قر پرەزيدەنتى اكىمشىلىگىندە سەكتور مەڭگەرۋشىسى جانە ت.ب لاۋازىمدى قىزمەتتەر اتقاردى.
استاناداعى ۇلتتىق اكادەميالىق كىتاپحانانىڭ باس ديرەكتورى بولدى.
جازۋشىنىڭ ءار جىلدارى "شەر", "جۇلدىزدار قۇلاعان جەر", "جايىق جىرى", "قاراشا قازدار قايتقاندا", "داۋىسىڭدى ەستىدىم", "وتۆەرجەننىي مير" اتتى پروزالىق جيناقتارى جانە تاڭدامالى شىعارمالارىنىڭ 2 تومدىعى جارىق كورگەن. قىتايدىڭ "ۇلتتار" باسپاسىنان قىتاي، قازاق تىلىندە 2 تومدىعى، رەسەيدىڭ "حۋدوجەستۆەننايا ليتەراتۋرا" باسپاسىنان ورىس تىلىندە ءبىر تومدىعى جانە قىرعىز تىلىندە كىتاپتارى جارىق كورگەن. جەكەلەگەن شىعارمالارى تۇرىك، اراب، اعىلشىن تىلدەرىندە باسىلعان. "بەيبارىس سۇلتان", "باس", "ناشاقور جايلى نوۆەللا", "نۇرجاۋعان-عۇمىر", "سىرىم باتىر", "مۇستافا شوقاي" سىندى پەسالارى رەسپۋبليكالىق جانە شەتەل تەاترلارىندا ساحنالانعان.
