«ءنۇرسات» شاعىناۋدانىندا 10 ۇيگە ورتاق الاڭ اباتتاندىرىلىپ، كوگالداندىرىلۋدا. ءبىر كەشەندى قۇرايتىن تۇرعىن ۇيلەر 2019-2020 جىلدارى الەۋمەتتىك تۇرعىدا وسال توپتارعا جاتاتىن وتباسىلار مەن جاستارعا بەرىلگەن.
بۇل نىسانعا قالا اكىمىنىڭ اپپارات باسشىسى عابيت ماۋلەنقۇلوۆ پەن قاراتاۋ اۋدانىنىڭ اكىمى ابزال الىقۇلوۆ ارنايى باردى. اۋلادا زاماناۋي ۇلگىدەگى بالالار الاڭشالارى مەن جاتتىعۋ ترەناجەرلارىن ورناتۋ باستاماسى ىسكە اسىپ جاتىر. جاسىل جەلەكتەر وتىرعىزىلىپ، ولارعا سۋ جەتكىزۋ جۇيەسىن ورناتۋ جۇمىستارى اتقارىلعان.
عابيت ماۋلەنقۇلوۆ مەردىگەر ۇيىمنىڭ وكىلدەرىنە اعاشتار وتىرعىزۋ مەن ولاردى كۇتىپ-ۇستاۋدا اگرارلىق تالاپتاردى قاتاڭ ۇستانۋدى تاپسىردى. ايتا كەتۋ كەرەك، سوڭعى التى جىلدا اۋدان اۋماعىندا كوپقاباتتى تۇرعىن ۇيلەردىڭ 95 اۋلاسى اباتتاندىرىلىپ، بارلىعىندا بالالار ويىن الاڭشالارى ورناتىلعان.
بيىلعى جىلى اتقارىلاتىن جۇمىستار ەكى كەزەڭ بويىنشا قاراستىرىلىپ، 31 اۋلاعا بالالار ويىن الاڭشالارى قويىلادى دەپ جوسپارلانعان. قازىر اباتتاندىرۋ جۇمىستارى ءتورت اۋلادا قىزۋ جۇرگىزىلۋدە. سونىمەن قاتار، اۋدان اۋماعىندا وسى جىلى 25 سپورت الاڭشاسى مەن 2 امبەباپ سپورت الاڭشاسى سالىنادى.
