«Nursát» shaǵynaýdanynda 10 úıge ortaq alań abattandyrylyp, kógaldandyrylýda. Bir keshendi quraıtyn turǵyn úıler 2019-2020 jyldary áleýmettik turǵyda osal toptarǵa jatatyn otbasylar men jastarǵa berilgen.
Bul nysanǵa qala ákiminiń apparat basshysy Ǵabıt Máýlenqulov pen Qarataý aýdanynyń ákimi Abzal Áliqulov arnaıy bardy. Aýlada zamanaýı úlgidegi balalar alańshalary men jattyǵý trenajerlaryn ornatý bastamasy iske asyp jatyr. Jasyl jelekter otyrǵyzylyp, olarǵa sý jetkizý júıesin ornatý jumystary atqarylǵan.
Ǵabıt Máýlenqulov merdiger uıymnyń ókilderine aǵashtar otyrǵyzý men olardy kútip-ustaýda agrarlyq talaptardy qatań ustanýdy tapsyrdy. Aıta ketý kerek, sońǵy alty jylda aýdan aýmaǵynda kópqabatty turǵyn úılerdiń 95 aýlasy abattandyrylyp, barlyǵynda balalar oıyn alańshalary ornatylǵan.
Bıylǵy jyly atqarylatyn jumystar eki kezeń boıynsha qarastyrylyp, 31 aýlaǵa balalar oıyn alańshalary qoıylady dep josparlanǵan. Qazir abattandyrý jumystary tórt aýlada qyzý júrgizilýde. Sonymen qatar, aýdan aýmaǵynda osy jyly 25 sport alańshasy men 2 ámbebap sport alańshasy salynady.
